अमेरिकाको इन्डियाना राज्यमा एक सशस्त्र हतियारधारीले अन्धाधुन्ध गोली चलाउँदा तीन जनाको मृत्यु भएकाे छ ।

आइतबार ग्रीनवुड पार्क मलमा भएको घटनामा अन्य तीन जना घाइते भएका छन् ।

त्यहाँको प्रहरीका अनुसार गोली हान्ने व्यक्तिको पनि ज्यान गएको बिबिसीले जनाएको छ । ​

सुरक्षाकर्मीको जबाफी फायरमा आक्रमणकारी मारिएको ग्रीनवुड इन्डियानाका मेयर मार्क मायर्सले बताएका छन् । 

संदिग्ध पुरुष भएको र उनको अहिलेसम्म पहिचान नभएको इन्डियाना प्रहरीले जनाएको छ । घटनाको अनुसन्धान भइरहेको छ ।

यसअघि गत जुलाई ४ मा शिकागोस्थित एउटा परेडमा अन्धाधुन्ध गोली चल्दा ७ जनाको मृत्यु हुनुका साथै ३५ भन्दा बढी घाइते भएका थिए ।