असोज २६, २०७७
भोजपुर- भोजपुरका सबै स्थानीय तहमा कोरोना अस्पताल निर्माण थालिएको छ । पौवादुङमा गाउँपालिका–४ मानेडाँडा, रामप्रसाद राई गाउँपालिका– ६ बैकुण्ठेमा र हतुवागढी गाउँपालिका–४ खैराङमा कोभिड अस्पताल निर्माणको तयारी थालिएको हो ।
केन्द्रबाट आएको परिपत्रअनुसार आवश्यक कर्मचारीका लागि दर्खास्त आह्वान गरिएको हतुवागढी गाउँपालिका अध्यक्ष प्रेमकुमार राईले जानकारी दिए ।
अध्यक्ष राईले भने, ‘केन्द्रबाट आएको निर्देशनअनुसार हामीले प्रक्रिया अगाडि बढाएका छौं । वडा– ४ खैराङमा निर्माण गर्ने लक्ष्यका साथ कर्मचारीको दर्खास्त माग गरिएको छ ।’
पौवादुङमा गाउँपालिकाले भने अस्पताल सञ्चालनका लागि आवश्यक स्वास्थ्यकर्मीसमेत छनोट सम्पन्न गरेर काम सुरु भइसकेको बताएको छ । वडा– ४ मानेडाँडामा निर्माण हुने अस्पतालमा गाउँपालिकाले ल्याबसमेत सञ्चालनमा ल्याउने पालिका अध्यक्ष किरण राईले जानकारी दिए ।
कोभिड अस्थायी अस्पताल निर्माणका लागि केन्द्रबाट १० लाख बजेट आएको र त्यसले ल्याब स्थापना गर्न रकम कम भए पनि गाउँपालिकाले नै ल्याब स्थापना गरेर दसैंअघिसम्म सञ्चालनमा ल्याउने तयारी गरेको अध्यक्ष राईले बताए ।
निर्माण हुन लागेको अस्पतालमा अक्सिजनसहितका ५ शैया रहने गाउँपालिका स्वास्थ्य शाखा प्रमुख ज्ञानु दाहालले जानकारी दिए ।
टेम्केमैयुङ, आमचोक, अरुण, साल्पासिलिछिको गाउँपालिका र षडानन्द नगरपालिकाले गान्धी अस्पतालमा राख्ने गरी प्रक्रियामा लागेको जनाएका छन् । त्यस्तै, अरुण गाउँपालिका र भोजपुर नगरपालिकाले पनि निर्माणको काम थालेका छन् ।
चैत २४, २०८०
चैत १३, २०८०
बैशाख २९, २०८१
बैशाख २७, २०८१
बैशाख २४, २०८१
बैशाख १९, २०८१
बैशाख १९, २०८१
