बाजुरा– बाजुराको गौमूल गाउँपालिकामा रहेको काल्चेको भीरमा सिँढीको सहारामा स्थानीय जोखिम मोलेरै यात्रा गर्न विवश छन् ।

गत २५ भदौमा आएको बाढीपहिरोले बनाएको बाटो र सडक बगाएपछि स्थानीयले जोखिम मोलेरै आउजाउ गर्नुपर्ने बाध्यता आइलागेको हो । 

देख्दै निकै डरलाग्दो भीर । त्यसैमा काठको सिँढीमा जोखिम यात्रा गर्नु परेको स्थानीयको गुनासो छ । काल्चेको भीर गौमूल गाउँपालिका वडा नम्बर ६ र २ को बीचमा पर्छ । 

‘यो भीरमा आउजाउ गर्दा आङै सिरिंग हुन्छ । त्यसैमा काठको सिँढीको सहायता लिएर त्रासपूर्ण वातावरणमा ओहोरदोहोर गर्नुपरेको छ’, गाँउपालिका अध्यक्ष हरिबहादुर रोकायाले भने ।
 
काठको सिँढीमा ओहोरदोहोर गर्दा अलिकति चिप्लियो सीधै तल बूढीगंगा नदी खसिने स्थानीय पदम नेपाली सुनाउँछन् । यो भीरलाई जिल्लामै जोखिम यात्राका रूपमा लिने गरिएको उनले बताए । ‘पहिला पनि निकै जोखिम हुने गरेको थियो । बाढीपहिरोले बाटो बगाएपछि थप जोखिम बढेको छ’, नेपालीले भने ।
 
भीरमा खाली हिँड्दा ज्यान जोखिममा पर्ने अवस्था रहेकाले भारी बोकेर गए बूढीगंगामा हराइने त्रास रहेको वडा नम्बर १ का वडाध्यक्ष बलबहादुर रोकायाले बताए । ‘यो बाटो भएर गौमूलको वडा नम्बर १, २ र ३ का स्थानीय ओहोरदोहोर गर्छन् । ३ वटै वडाबासीले गाउँपालिकाको कार्यालय आउन पनि यही बाटो प्रयोग गर्नुपर्ने बाध्यता छ,’ रोकायाले भने ।

सामान ढुुवानी साधनको रूपमा रहेको खच्चर पनि भदौबाट बन्द हुँदा गाउँपालिकाको वडा नम्बर १, २ र ३ मा विकास निर्माणका कामसमेत प्रभावित रोकायाले जानकारी दिए ।
 
गाउँपालिका अध्यक्ष हरिबहादुर रोकाया बाढीपहिरोका कारण बाटो निर्माण गर्न समस्या रहेको बताउँछन् । ‘काम गर्न लगाइरहेका छाँै । धेरै अप्ठेरो भएकाले समय लाग्छ । नागरिकलाई केही सहज होस् भनेर गाउँपालिकाले सिँढी निर्माण गरेको हो’, अध्यक्ष रोकायाले भने ।

भीरमा सिँढी आउजाउ गर्न महिला, बालबालिका र वृद्धलाई झनै समस्या रहेको स्थानीय हीरेन्द्र रोकायाले सुनाए । ‘बलियाबांगाले त जसोतसो पार गर्छन् । अशक्त, अपांगलाई निकै सकस हुने गरेको छ,’ उनले भने ।

गाउँपालिका उपाध्यक्ष सीता रोकायाले पनि जोखिम यात्राले सास्ती दिएको बताइन् । गाउँपालिकाबाट वडामा सामान ढुुवानीसँगै स्थानीयलाई खाद्यान्न लैजान समस्या भएको उनले भनाइ छ ।