जुम्ला– जुम्लाको गुठीचौर गाउँपालिकाको पाटनमा सोमबार चट्याङ लागेर भेडाबाख्रा मरेका छन् । चट्याङ लागेर करिब ४० भेडा मरेका छन् भने १५ भेडा घाइते भएका छन् ।

गुठीचौर गाउँपालिकाको वडा नम्बर ४ स्थित सामुदायिक वनको चिमारा लेक नजिकै डाबमा चट्याङ लागेर सोही वडाका स्थानीय नानो भण्डारीका १०, मुनबहादुर भण्डारीका ४, मुणिप्रसाद अधिकारीका १७ र देवीप्रसाद अधिकारीका ९ भेडा मरेको इलाका प्रहरी कार्यालयका गुठीचौरका इन्चार्ज कमल श्रेष्ठले बताए । उनले भने, ‘चट्याङ लागेर भेडाबाख्रा मरेपछि करिब ६ लाख ५० हजार रुपैयाँको बराबरको क्षति भएको छ ।’ 

भेडाखर्क पाटन क्षेत्रमा परेको चट्याङबाट भेडापालक किसानको पुख्र्यौली पेसा संकटमा परेको गाउँपालिकाका निमित्त प्रमुख प्रशासकीय अधिकृत अम्मराज गिरीले बताए ।

यो क्षेत्रका अधिकांश स्थानीयको मुख्य आम्दानीको स्रोत भनेकै भेडापालन हो । गिरीले भने, ‘भेडापालक किसानलाई राहतका लागि गाउँपालिकामा छलफल भइरहेको छ ।’

भेडा मरेपछि व्यावसायिक रूपमा भेडा पालेरै जीविकोपार्जन गर्दै आएका किसानलाई रोजीरोटी जुटाउन मुस्किल पर्ने स्थानीय बताउँछन् । ठूलो मात्रामा क्षति भएपछि स्थानीयले राहतको माग गरेका छन् । जुम्लामा गत २०७० मा निरन्तर परेको असिना, पानी र हावाहुरीले करिब सात सय भेडाबाख्रा मरेका थिए भने २०७७ मा ५ सय भेडा मरेको तथ्यांक छ ।