खोटाङ– खोटाङमा झण्डै १० वर्ष लगाएर महिला बालबालिका पुनर्स्थापना केन्द्रको भवन निर्माण गरिएको छ ।
आर्थिक वर्ष २०६९/०७० सालदेखि दिक्तेलको रत्नपार्क(किरातचोक) भन्दा केहीमाथि १० वर्ष लगाएर पूर्णता दिइएको एकतले भवन महिला बालबालिका पुनर्स्थापना केन्द्रको साधारणसभाको अवसरमा मंगलबार प्रतिनिधिसभा सांसद हिरा गुरुङले उद्घाटन गरेकी छन् ।
विभिन्न प्रकृतिका हिंसामा परेका महिला तथा बालबालिकालाई आश्रय दिएर संरक्षण गर्नका लागि तीन कोठे भवन निर्माण गरिएको हो । कृषिविज्ञ मदन राईले निःशुल्क जग्गा उपलव्ध गराएपछि केन्द्रको भवन निर्माण गरिएको महिला बालबालिका पुनर्स्थापना केन्द्रकी अध्यक्ष पुर्णमाया तामाङले बताइन् ।
आर्थिक वर्ष २०६९/०७० मा स्थानीय बिकास मन्त्रालयको ६ लाख, तत्कालिन जिल्ला विकास समितिको ३ लाख, आर्थिक वर्ष २०७६÷०७७ मा प्रदेशसभा सांसद उषाकला राईको संसदीय विकास कोषको ५ लाख, चन्दा संकलनबाट जम्मा भएको ६२ हजारलगायतको खर्चमा महिला केन्द्रको भवन बनेको हो ।
भवन निर्माणका क्रममा २२ लाखदेखि २५ लाखको हाराहारीमा खर्च भएको केन्द्रले जनाएको छ । केन्द्रको भवन निर्माणका क्रममा संस्थालाई करिव ६ लाखको हाराहारीमा ऋण लागेको अध्यक्ष तामाङले बताइन् ।
सेफहाउसको अभावमा हालसम्म हिंसा पीडित महिला तथा बालबालिकालाई अधिकारकर्मीको घर, कोठा वा संघसंस्थाको संरक्षणमा राख्ने गरिएको छ । भवन निर्माण भएपछि हिंसा पीडित महिला तथा बालबालिकालाई झन्झटकासाथ विभिन्न ठाउँमा असुरक्षित तरिकाले राख्नुपर्ने समस्या हल भएको केन्द्रकी अध्यक्ष तामाङले बताइन् ।
केन्द्रमा हिंसा पिडित पुरुष र अपांगता भएका व्यक्तिलाई समेत संरक्षण दिन सकिने जनाइएको छ । तर, जिल्लामा हालसम्म हिंसामा परेका महिला तथा बालबालिकाको उद्धार तथा संरक्षण गर्नका लागि पुनर्स्थापना केन्द्रको अभाव थियो । पुःर्नस्थापना केन्द्रको अभावमा हिंसा पिडित वा प्रभाबितलाई महिला रक्षक सञ्जाल, अन्तरपार्टी महिला सञ्जाल, अधिकारकर्मी लगायतले सहयोग गर्दै आएका छन् ।
जग्गादाता राईलाई सम्मान
केन्द्रले भनवनका लागि निःशुल्क जग्गा प्रदान गर्ने जग्गादाता कृषिविज्ञ मदन राईलाई सम्मान गरेको छ । साधारणसभा तथा केन्द्रको भवन उद्घाटनको अवसरमा जग्गादाता राईलाई सम्मान–पत्र सहित सम्मान गरिएको हो ।