पालिकाखबर फलोअप

शिक्षिकाको तलब झ्वाम पार्ने प्रधानाध्यापक कानुनी फन्दामा


  • change font
  • change font
  • change font

बाजुरा– बाजुराको बूढीनन्दा नगरपालिका वडा–३ स्थित कालिका आधारभूत विद्यालयका प्रधानाध्यापक मानसिहं विष्टलाई कानुनी कठघरामा ल्याइएको छ ।


नगरपालिकाको वडा–३  स्थित कालिका आधारभूत विद्यालयमा पढाउने एक शिक्षिकाले तीन वर्षदेखि तलब नपाएको गुनासोको खबर पालिका खबरमा प्रकाशित भएसँगै विष्टलाई सोधपुछ गर्न इलाका प्रहरी चौकी कोल्टीमा बोलाइएको कोल्टी प्रहरीले बताएको छ ।


१२ चैत २०७५ सम्मको तलबमध्ये २८ हजार पाउन बाँकी रहेको र त्यसपछि हालसम्मको तलब नै नदिएको शिक्षिका सीता तिमिल्सेनाले जानकारी दिइन् ।
 

‘शिक्षिका तिमिल्सिनाले विभिन्न निकायमा तलब नपाएको भनी निवेदन दिएकी रहिछन् । के–कति कारणले तलब नपाएको हो र विद्यालयले नदिएको भन्ने विषयबारे सोधपुछ गर्न प्रधानाध्यापक विष्टलाई इलाका प्रहरी चौकी कोल्टीमा बोलाएको थियौं’, प्रहरी नायव निरीक्षक नरेश शाहीले भने ।


किर्ते गरेर शिक्षिकाको तलब गाउँपालिका अध्यक्ष र विद्यालयका प्रधानाध्यापकले खाएको प्रमाण भेटिएकाले सोधपुछका लागि इलाका प्रहरी कार्यालय कोल्टीमा बोलाइए पनि सामान्य सोधपुछपछि छाडिएको उनले बताए ।


अहिले विद्यालय बन्द भएकाले सबै  कागजात जुटाउन समस्या भएको प्रधानाध्यापक विष्टले दाबी गरेका छन् । ७ मंसिरदेखि विद्यालय सञ्चालन भएपछि  सबै कागजजात जुटाउने प्रतिबद्धता जनाएकाले छाडिएको प्रहरी नायब निरीक्षक शाहीले जानकारी दिए ।

‘अहिले शिक्षिका सीता उपचारका लागि काठमाडौं रहेकी र विद्यालय व्यवस्थापन समिति अध्यक्षसँग पनि सोधपुछ नभएकाले विद्यालय सञ्चालन भएको समय तीनै पक्ष राखेर कानुनी प्रक्रियामा जान्छौं’, उनले भने ।


तलब नदिएको भन्दै पहिले सोही विद्यालयमा पढाएकी शिक्षिका कल्पना भाटले पनि न्यायिक समितिमा उजुरी दिएकी छन् । विद्यालयले पूर्वशिक्षक जनक पण्डित, धर्म विक, राजेन्द्र तिमिल्सिनालगायतलाई तलब नदिएको सूचना सार्वजनिक भएको छ ।

 
२०७४ को जेठमा कालिका आधारभूत विद्यालय भुल्यानामा विद्यालय व्यवस्थापन समिति बैठकको निणर्यले निम्न माध्यमिक तहको अंग्रेजी विषय शिक्षकमा निजी स्रोतबाट ६ हजार पाँच सय रुपैयाँ तलब पाउने गरी सीतालाई नियुक्त गरिए पनि हालसम्म तलब नपाएपछि उनले सरोकारवाला निकायको ध्यानाकर्षण गराएकी थिइन् ।


२०७४ को शैक्षिक सत्र सकिएपछि २०७५ देखि स्कुलमा पहिलेको तलबमा काम गर्न नसक्ने बताएकी सीतालाई तलब बढाउने आश्वास दिइए पनि पहिलेको तलब दिइएको थिएन ।


२०७५ पुसमा पुनः विद्यालय व्यवस्थापन समितिको बैठक बसेर परिचर तारा विक र निमावि शिक्षक सीताको ५ हजार तलब बढाउने निणर्य गरेका अध्यक्ष जंगवीर रोकायाले बढेको र पहिलेको तलब दिएका छैनन् ।


‘२०७५ चैतयता तलब पाएकी छैन । मेरो नाममा प्रधानाध्यापक र विद्यालय व्यवस्थापन समितिका अध्यक्ष  मिलेर तलब लिएको भौचरमा हस्ताक्षर गर्न लगाएका रहेछन् । यो कुरा मलाई थाहा भएन । तर, पछि घटना बाहिर आएपछि प्रधानाध्यापक विष्टले आफैंले तलब बुझेको स्वीकारेका छन्’, शिक्षिका सीताले भनिन् ।