काठमाडौं– सरकारले कोरोना जोखिमको मूल्यांकन गरी स्थानीय तहलाई विद्यालय खोल्ने अधिकार दिएसँगै देशभरका पालिकाहरु विद्यालय खोल्ने छलफलमा जुटेका छन् । कतिपय स्थानीय तहले आइतवारबाट पठनपाठन सुरु गर्ने निर्णय गरेका छन् ।

सिन्धुलीको कमलामाई नगरपालिकामा रहेका विद्यालय आइतवारबाट संचालन हुने भएका छन् । शुक्रबार शिक्षक, अभिभावक, विद्यालय व्यवस्थापन समिति, शिक्षक, अभिभावक संघ, विद्यार्थी लगाएत सरोकारबालाहरुको बैठकले स्वास्थ्य सुरक्षाका मापदण्ड अप्नाएर विद्यालय सञ्चालन गर्न सकिने निर्णय गरेको कमलामाई नगरपालिकाका प्रमुख खड्गबहादुर खत्रीले जानकारी दिए ।

कमलामाई नगरपालिका अन्र्तगत रहेका सवै विद्यालयहरुले शिक्षा, विज्ञान तथा प्रविधि मन्त्रालयले जारी गरेको विद्यालय सञ्चालन सम्बन्धि कार्यढाँचा २०७७ बमोजिम कार्ययोजना बनाएर विद्यालय सञ्चालन गर्नु पर्ने उनले जानकारी दिए ।

सरुमारानीका पनि आइतवारबाटै

प्यूठानको सरुमारानी गाउँपालिका भित्रका विद्यालय पनि आइतवारबाटै खुल्ने भएका छन् ।

गाउँपालिकाको गाउँ शिक्षा समितिको बैठकबाट तय भएका १३ बुँदे मापदण्ड अनुसार विद्यालय सञ्चालन गर्ने निर्णय गरिएको गाउँपालिका निमित्त प्रमुख प्रशासकीय अधिकृत ओमु गिरीले जानकारी दिए । विद्यालयलाई स्वास्थ्य मापदण्डहरु पालना गरी उच्च सतर्कताका साथ सजकता अपनाई विद्यालय सञ्चालन गर्न आग्रह गरिएको उनले बताए ।

जिल्ला कोभिड संकट व्यवस्थापन केन्द्र(डिसिसिएमसी) को बिहिवार बसेको बैठकले बिद्यालय पठनपाठन  स्थानीय तहले कोभिडको अवस्था, सहजता हेरेर आवस्यक निर्णय लिन सक्ने निर्णय गरेको थियो । सोही अनुसार सरुमारानी गाउँपालिकाले बिद्यालय खोल्ने निर्णय गरेको जनाएको छ ।

सरुमारानी गाउँपालिका भित्र १८ प्रावि, आधारभुत २, मावि ७ , मदरसा २ वटा, संस्थागत ३ वटा गरी ३२ वटा विद्यालय छन् ।

स्याङ्जाको भीरकोट नगरपालिकाका सबै विद्यालय आइतवारबाटै खुल्दैछन् ।

नगरपालिकाका शिक्षा प्रतिनिधि तथा विभिन्न सामुदायिक र संस्थागत विद्यालयका प्रिन्सिपल तथा प्रधानाध्यापकहरुबीच भएको छलफलमा आइतबारदेखि विद्यालय संचालन गर्ने सहमति भएको हो ।

केही समयअघि मात्रै शिक्षा मन्त्रालयले विद्यालय संचालन गर्ने जिम्मा स्थानीय निकायलाई दिएपछि नगरलपालिकाले सक्रियता बढाएको हो ।

विद्यालय संचालन गर्न भने स्वास्थ्य सम्बन्धी मापदण्ड अनिवार्य रुपमा अपनाउनुपर्ने छ । विद्यालय सवारीमा मास्क र सेनिटाइजर अनिवार्य राख्नुपर्ने छ । विद्यालय प्रवेशद्वारमा नै हात धुने व्यवस्था गरिएको हुनुपर्नेछ । स्वास्थ्य सम्बन्धी कुनै समस्या देखिएमा तत्काल नजिकको स्वास्थ्य संस्थामा जानकारी गराउनुपर्ने छ ।

हेटौंडामा खोल्ने कसरत

कोरोना भाइरस जोखिम नभएका तथा कम जोखिम भएका विद्यालय सञ्चालनको जिम्मा स्थानीय सरकारले पाएपछि हेटौंडाका विद्यालय खोल्ने कसरत गरिएको छ ।

शिक्षा विज्ञान तथा प्रविधि मन्त्रालयले कार्यविधि तयार गरी विद्यालय सञ्चालन गर्ने जिम्मा स्थानीय सरकारलाई दिएको थियो । हेटौंडा उपमहानगरपालिकाले शुक्रबार निजी विद्यालयका प्रधानाध्यापकसँग अन्तक्र्रिया गर्दै विद्यालय सञ्चालनको विषयमा छलफल गरेको छ । हेटौंडाका नगर प्रमुख हरि बहादुर महतले स्वास्थ्य सावधानी अपनाएर विद्यालय खोलिने जानकारी दिए ।

धेरै विद्यार्थी भएका विद्यालयमा पालैपालो पठनपाठन गर्ने महतले बताएका छन् । विद्यालयले स्यानीटाइजर, मास्क, हात धुने साबुनको अनिवार्य व्यावस्था गरी सामाजिक दुरी कायम गरेर मात्र पठनपाठन सञ्चालन गर्न आग्रह गरे । उपमहानगरले आगामी आइतबार सामुदायिक विद्यालयका प्रधानध्यापकसँग विद्यालय खोल्ने विषयमा छलफल गर्ने भएको छ ।

छलफलबाट निस्किएको निष्कर्षका आधारमा नगर शिक्षा समितिको बैठकले विद्यालय सञ्चालनको निर्णय गर्ने महतले बताए । निजी विद्यालयका प्रधानाध्यापकसँग कक्षा १ देखि १२ सम्मको पठनपाठन कसरी सञ्चालन गर्ने ? भन्ने विषयमा लिखित सुझाव लिइएको छ । कोरोना भाइरस संक्रमणका कारण विगत ८ महिना देखि निजी तथा सामुदायिक विद्यालय बन्द छन् ।

लकडाउनको अवस्थामा विद्यालय नै आइसोलेसन तथा क्वारेन्टाइनको रुपमा समेत प्रयोग भएका थिए । यसबीच वैकल्पिक विधिबाट समेत कतिपय विद्यालयले पठनपाठन सञ्चालन गरिरहेका छन् । तर अनलाइन प्रणालीमार्फत् सबै विद्यार्थीहरुको पहुँच पुग्न सकेको छैन ।