चैत १९, २०८०
मंसिर २३, २०७७
खोटाङ - खोटाङको केपीलासगढी गाउँपालिकाले मुन्धुम ट्रेल (पदमार्ग)लाई पर्यटन प्रवर्द्धनकाे माध्यमका रुपमा उपयोग गर्ने तयारी गरेको छ । पूर्वी पहाडका चार जिल्लाको पर्यटन प्रवर्द्धनका लागि परिकल्पना गरिएको मुन्धुम ट्रेललाई प्रयोग गर्दै गाउँपालिकाले पर्यटन प्रवर्द्धनकाे योजना अघि सारेको हो ।
गाउँपालिकाले जि-फाउण्डेसनसँगको सहकार्यमा चखेवाबाट मैयूडाँडा, सातदोबाटो, बगरेभञ्ज्याङ, जुगेडाँडा, लौरोडाँडा, निकास हुँदै साल्पा पोखरी पुग्ने मुन्धुम ट्रेल जोड्ने सहायक पदमार्ग निर्माण गर्ने, मुन्धुम ट्रेल स्तरोन्नती गर्ने, मुन्धुम ट्रेलको आसपासमा होमस्टे लगायतका संरचना निर्माण गर्ने योजना बनाएको छ ।
विशेषगरी मुन्धुम ट्रेललाई पछ्याउँदै खोटाङ, भोजपुर, सोलुखुम्बु र संखुवासभाको बिचमा रहेको धार्मिक तथा पर्यटकीयस्थल साल्पा पोखरी जोड्नेगरी पूर्वाधार विकासको काम सुरु गरिएको केपीलासगढी गाउँपालिकाका अध्यक्ष कृष्णकुमार राईले बताए । मुन्धुम ट्रेलको करिब ४८ किलोमिटर खण्ड केपीलासगढी गाउँपालिकाभित्र पर्छ ।
मुन्धुम ट्रेल प्रयोग गरेर गाउँपालिकाबाट सहजरुपमा साल्पा पोखरी पुग्ने र फर्कने वातावरण बनाउनका लागि आवश्यक पूर्वाधार विकास गर्न चालु आर्थिक वर्ष गाउँपालिकाले ८ लाख र जि-फाउण्डेसनले ८ लाख विनियोजन गरेको छ । खोटाङ, सोलुखुम्बु, भोजपुर र संखुवासभाको रमणीय स्थलको पर्यटन प्रवर्द्धन गर्ने उद्धेश्यले २०७५ सालमा तयार पारिएको मुन्धुम ट्रेलले चार वटै जिल्लाभित्र रहेका चखेवाभञ्ज्याङ, मैयुङडाँडा, हाँसपोखरी, सातदोबाटो, रावाधाप, साल्पापोखरी, सिलिचुङडाँडा लगायतका पर्यटकीय स्थललाई जोडेको छ ।
यस्तै, प्रदेश सरकार र गाउँपालिकाको बजेटबाट मुन्धुम ट्रेलको आसपासमा पर्ने सुंदेलको निकासदेखि जम्बुडाँडासम्मको पदमार्ग मर्मत, रावाधाप, धाप्लेदुन, रिमादुन, निकास, जम्बूढुंगादेखि सहदेउखर्क खानेपानी योजना सञ्चालन, जलजले-देउराली पदमार्ग मर्मत, रेवामुहान संरक्षण तथा रिचार्ज पोखरी निर्माण र रेवामुहान ईलाका जरबुटा संरक्षणका काम गरिनेछ ।
पर्यटन विकासका लागि प्याराग्लाइडिङदेखि केबुलकारको सपना
मुन्धुम ट्रेलका माध्यमबाट पर्यटन विकासका लागि केपीलासगढी गाउँपालिकाले बहुवर्षीय योजना समेत बनाएको छ । लौरेडाँडादेखि सुंदेलसम्म प्याराग्लाइडिङ र स्काई डाईभ तथा लौरेडाँडा-चिलिमढुंगादेखि फेदीसम्म केबुलकारको सम्भाव्यता अध्ययन गर्ने बहुवर्षीय योजनाको परिकल्पना गरिएको गाउँपालिका अध्यक्ष राईले बताए ।
साथै छमुवाखोला मुहानमा करिब ३ वर्गकिलोमिटर क्षेत्रमा फैलिएको सिमसार क्षेत्र संरक्षण गर्ने, लौरेडाँडा-चिलिमढुंगा-ढालतरबार पदमार्ग निर्माण गर्ने, केपीलासगढीडाँडा पदमार्ग निर्माण गर्ने लगायतका बहुवर्षीय योजना सञ्चालन गर्ने गाउँपालिकाको लक्ष्य छ । यसका लागि बजेट तयार गर्ने र क्रमशः योजना अघि बढाइने गाउँपालिका अध्यक्ष राईले बताए ।
चैत १९, २०८०
चैत १९, २०८०
चैत २२, २०८०
चैत १८, २०८०
