चैत २४, २०८०
पुस ०६, २०७७
ताप्लेजुङ– प्रतिनिधिसभा विघटनलाई प्रतिगमनको संज्ञा दिँदै ताप्लेजुङको फुङलिङमा सत्तारुढ दलकै विद्यार्थी घटक अनेरास्ववियु र युवा दस्ता युवा संघ नेपालले प्रधानमन्त्री केपी ओलीको पुत्ला जलाएका छन् ।
वीरेन्द्र चोकबाट नाराबाजीसहित निस्किएको र्यालीले तोक्मेमा पुगेर प्रधानमन्त्री ओलीको पुत्ला दहन गरेको हो । कार्यक्रममा अनेरास्ववियुका केन्द्रीय सदस्य प्रजिन हाङ्वाङले जनमतविपरीत गरिएको संसद् विघटन कुनै पनि हालतमा स्वीकार्न नसकिने बताए ।
अनेरास्ववियुका जिल्ला संयोजक डिल्लीराम न्यौपानेले दुई तिहाइ नजिकको जनमत प्राप्त पार्टीकै सरकारका नेतृत्वकर्ताबाट भएको संसद् विघटन अराजनीतिक भएको टिप्पणी गरे ।
विरोध कार्यक्रममा जिल्ला समन्वय समिति प्रमुख घनेन्द्र मादेन, नेकपाका प्रदेश कमिटी सदस्य, जिल्ला कार्यालय सदस्यलगायत सहभागी रहेको अनेरास्ववियुका जिल्ला सह–संयोजक किरण लिङ्देनले जानकारी दिए ।
जनप्रतिनिधिको एउटै बोलीः प्रतिनिधिसभा विघटन जनमतको अपमान
२०७४ सालको स्थानीय तह निर्वाचनमा ताप्लेजुङका ९ स्थानीय तहमध्ये फुङलिङ नगरपालिकासहित ५ तहको प्रमुखमा तत्कालीन नेकपा एमालेले जित हात पारेको थियो । नेपाली कांग्रेस ४ स्थानीय तहका अध्यक्ष पदमा विजयी भयो ।
तत्कालीन नेकपा माओवादी (केन्द्र) ले दुई उपप्रमुख÷उपाध्यक्ष पद मात्र जित्यो । स्थानीय तहका १८ प्रमुख पदमध्ये एमालेले प्रमुख र उपप्रमुख ५–५, कांग्रेसले ४ प्रमुख र २ उपप्रमुख तथा तत्कालीन माओवादी केन्द्रले २ उपप्रमुख पद जितेका थिए ।
तत्कालीन एमालेले मैवाखोला, पाथीभरा याङ्बरक र फक्ताङलुङ गाउँपालिकाका दुइटै प्रमुखमा जित हात पा¥यो । तत्कालीन एमालेले फुङलिङ र मिक्वाखोलामा प्रमुख पद मात्र जित्यो ।
कांग्रेसले सिरिजंघामा प्रमुख–उपप्रमुख दुवै पद जित्यो भने आठराई त्रिवेणी, मेरिङ्देन र सिदिङ्वाका अध्यक्ष पद जित्यो । आठराई र मेरिङ्देनमा तत्कालीन एमालेले उपाध्यक्ष पद जित्यो भने सिदिङ्वा गाउँपालिका भने तत्कालीन माओवादी केन्द्रले उपाध्यक्ष पदमा विजयी भयो ।
फुङलिङ, सिदिङ्वा र मेरिङ्देन गाउँपालिकामा प्रमुख पद दिएर कांग्रेससँग सहकार्य गरेको तत्कालीन माओवादी केन्द्रले नगरपालिका र सिदिङ्वामा मात्र उपप्रमुख पद आफ्नो पक्षमा पारेर मेरिङ्देन गुमायो ।
तत्कालीन माओवादी केन्द्रसँग चुनावी सहकार्य गरे पनि कांग्रेसले फुङलिङको नगरप्रमुख पद नै गुमायो । फुङलिङको नगरप्रमुखमा कांग्रेसलाई धक्का लागेजस्तै मेरिङ्देनमा तत्कालीन माओवादी केन्द्रलाई उपाध्यक्ष पदमा विजय हुन सकस परेको हो ।
तत्कालीन एमाले र माओवादीको पार्टी एकतापछि ताप्लेजुङका १८ प्रमुख दुई पदमध्ये नेकपाका पक्षमा १२ पद छन् । तर, अहिले फुङलिङ नगरप्रमुख छत्रपति प्याकुरेल मात्रै आफूलाई ओली पक्षधर भन्छन् ।
पाथीभरा याङ्बरक गाउँपालिका अध्यक्ष केशरकुमार मेन्याङ्वोले त खुलेरै प्रतिनिधिसभा विघटनको विरोध गरेका छन् । उनले सामाजिक सञ्जालमा ओलीप्रति पहिल्यै शंका लागेको भए पनि महाधिवेशनबाट निर्वाचित भएकाले आफूहरूले मानेको तर प्रतिनिधिसभा विघटन गरेर पार्टी तहसनहस बनाएको आरोप लगाए ।
जिल्ला समन्वय समिति प्रमुख घनेन्द्र मादेनले त प्रधानमन्त्री ओलीलाई नालायकसम्म भन्न भ्याए । संसद बिगठन प्रति संकेत गर्दै उनले यस कार्यले सिङ्गो जनमतको अपमान भएको प्रतिक्रिया सामाजिक सञ्जालमा दिएका छन् ।
फुङलिङ नगर उपप्रमुख बमबहादुर भट्टराईले प्रतिनिधिसभा विघटनप्रति रोष प्रकट गर्दै ‘ठाडो घाँटी पारेर जति थुके पनि आफ्नै अनुहारमा’ भनेका छन् । पूर्वसांसद तिलकुमार मेन्याङ्बोले प्रतिनिधिसभा विघटन जनादेशको अपमान र ऐतिहासिक भूल भएको बताए ।
चैत १९, २०८०
चैत १९, २०८०
चैत २२, २०८०
चैत १८, २०८०
