देशभरका पालिकामा के भए ? कुन जनप्रतिनिधिले के काम गरे ? कसले कहाँ अनियमितता गर्यो ? कहाँ कसले कस्ता गतिविधि गरे ? दिनभरका खबर
१) बालविवाह रोक्न बाजुराको बुढीनन्दा नगरपालिकाले सुरु गर्यो अभियान, पुजारी र पुरोहितहरूसँग ३ बुँदे सम्झौता ।
२) जुम्लाको पातारासी गाउँपालिका विद्युतमा आत्मनिर्भर, जिल्लाकै पहिलो उज्यालो पालिका घोषणा गर्ने तयारी ।
३) स्रोत नखुलेको १ करोड ४७ लाख रुपैयाँसहित भारतीय नागरिक काठमाडौंबाट पक्राउ, प्रहरीले सुरु गर्यो अनुसन्धान ।
४) हुम्लाको विभिन्न स्थानमा हिमपात, हिमपात भएसँगै चिसो बढेपछि जनजीवन प्रभावित, विमान सेवासमेत अवरुद्ध ।
५) पर्वतको मोदी गाउँपालिकाको आफ्नै लोगो तयार, राम्जा देउरालीका कृष्णप्रसाद शर्माले बनाएको लोगो उत्कृष्ट ।
६) प्रदेश १ सरकारले ६९ वटा स्थानीय तहमा अपाङ्गता रोकथाम तथा पुनर्स्थापना कार्यक्रम संचालन गर्ने, विराटनगरमा समुदायमा आधारित ४५ दिने पुनर्स्थापना सहजकर्ता तालिम सुरु ।
७) कालीकोटको नरहरिनाथ गाउँपालिका- ९ का दुर्गाराज बोहोरा र जाजरकोट भेरी नगरपालिका- २ का पदमबहादुर पुन विस्फोटक पदार्थसहित पक्राउ, पक्राउ परेका व्यक्ति र सरसामान सार्वजनिक ।
८) ताप्लेजुङको मेरिङ्देन गाउँपालिकाको हिउँदे अधिवेशन सुरु, बेरुजु फर्छ्योट मुख्य एजेण्डा ।
९) खोटाङको जन्तेढुंगा गाउँपालिका- २ बोपुङमा सामुदायिक स्वास्थ्य इकाइ केन्द्र स्थापना, अब वडावासीले गाउँमै उपचार पाउने ।
१०) स्याङ्जाको आँधीखोला गाउँपालिकाद्वारा कृषकलाई ५० प्रतिशत अनुदानमा ८० वटा हाते ट्र्याक्टर वितरण, दोस्रो चरणमा थप २५ जना किसानले पाउने ।
११) काठमाडौंको त्रिभुवन अन्तर्राष्ट्रिय विमानस्थलबाट ९ एमएमको पेस्तोल र पेस्तोलमा प्रयोग हुने ५० थान गोलीसहित एक जना पक्राउ, पक्राउ पर्नेमा झापा मेचीनगर- २ का बद्रीहाङ राई ।
१२) जुम्लाका जनप्रतिनिधि छुई गोठमुक्त गर्ने अभियानमा, तातोपानी गाउँपालिकाको हाँकुगाउँ छुई गोठमुक्त ।
१३) चिसो बढेसँगै बझाङको थलारा गाउँपालिकाले ज्येष्ठ नागरिकलाई ब्ल्याङ्केट वितरण गर्न सुरु गर्यो, पहिलो चरणमा ४० जनाले पाए ब्ल्याङ्केट ।
१४) तनहुँको बन्दीपुर गाउँपालिकाको कार्यालयमा राखियो डिजिटल नागरिक बडापत्र, पालिकाको सेवालाई डिजिटल प्रणालीमा रूपान्तरण गर्ने अभियान ।
१५) बैतडीको सिगास गाउँपालिका- ९ बाँजपानीमा ट्र्याक्टर दुर्घटना हुँदा १ जनाको मृत्यु, २ जना घाइते ।
१६) उदयपुरको बेलका नगरपालिकाले कोसी माविमा अध्ययनरत ४५ जना छात्रालाई दियो साइकल, साइकलले विद्यार्थीलाई आवतजावत गर्न सहज ।
१७) इलामको सूर्योदय नगरपालिकाको हिलेमा पिलर गाड्न खोज्ने भारतीय सीमा सुरक्षा बलको टोलीलाई स्थानीयले लखेटे, नयाँ नेतृत्व आएपछि पिलर गाड्ने प्रयास ।
१८) कैलालीको धनगढी उपमहानगरपालिकामा भूमिसम्बन्धी समस्या समाधान आयोगको इकाइ कार्यालय स्थापना, उपमहानगरपालिकामा रहेका भूमिहीन सुकम्बासी र अव्यवस्थित बसोवासीको पहिचान र लगत संकलन गरिने ।
१९) कैलालीको बर्दगोरिया गाउँपालिका- ४ का नैनबहादुर कठरिया गैँडाको खागसहित पक्राउ, कठरियामाथि प्रहरीले थाल्यो अनुसन्धान ।
२०) दाङको तुलसीपुरबाट घोराही आउँदै गरेको ना६ख १८१४ नम्बरको बस ग्वार खोलामा दुर्घटना हुँदा १९ जना यात्रु घाइते ।