ताप्लेजुङ– स्वास्थ्य तथा जनसंख्या मन्त्रालयले अस्पतालमा स्तरोन्नति हुने स्वास्थ्य संस्थाका लागि सम्बन्धित स्थानीय तहका कार्यपालिकाको निर्णयबाट छनोट गरी जिल्ला समन्वय समितिको सिफारिससहितको पत्र मन्त्रालयमा पठाउन देशभरका २ सय ५९ स्थानीय तहलाइ परिपत्र गरेको छ ।
यसअघि यस्तो रकम देशभरका २६४ पालिकाले पाइसकेका छन् । स्थानीय तहले यो विवरण आउँदो फागुन मसान्तसम्म पठाइसक्नुपर्ने मन्त्रालयले जनाएको छ । मन्त्रालयले अस्पताल निर्माणका लागि तोकिएको मापदण्डबमोजिमको जग्गा व्यवस्थापन गरी पठाउन पनि स्थानीय तहलाई भनेको छ ।
मन्त्रालयले आगामी आर्थिक बर्ष २०७८/०७९ मा भवन निर्माणको बजेट व्यवस्था गर्ने गरी चालू आर्थिक वर्षमै विस्तृत परियोजना प्रतिवेदन (डीपीआर) का लागि लागत सहभागितामा बजेट पठाउने गरी निर्णय भएको छ ।
मन्त्रालयका तथ्यांक अधिकृत सूर्यबहादुर खड्काका अनुसार अस्पताल नभएका स्थानीय तहमा आगामी आवमा ५÷१०÷१५ शय्याका आधारभूत अस्पताल निर्माण सुरु गरिनेछ ।