झापा– झापाको कमल गाउँपालिकाका जनप्रतिनिधिले पालिकाभित्रका ज्येष्ठ नागरिकलाई घरघरमै गएर भत्तासँगै न्यानो कपडा वितरण गर्न थालेका छन् ।
गाउँपालिका अध्यक्ष मेनुका काफ्लेले ज्येष्ठ नागरिकलाई टोलदेखि घरसम्म पुगेरै सम्मान गर्दै आएको बताइन् । उनले भनिन्, ‘पालिकाका ८५ वर्षदेखि ९० वर्ष उमेर समूहका ज्येष्ठ नागरिकको अवस्था बुझ्न र जाडोमा फाइबरको सिरक, पौस्टिक तत्त्वयुक्त खानेकुरा लिएर जाने गरेका छौँ । घरघरमा पुग्दा कतिपय ज्येष्ठ नागरिकको अवस्था दयनीय पाइए पनि हामीले दिएको सम्मानपछि खुसी हुने गरेका छन् ।’
पालिकाले चालू आर्थिक वर्षको बजेटमा २ लाख रुपैयाँभन्दा बढी बजेट ज्येष्ठ नागरिकको सम्मानका लागि छुट्याएको छ । कार्यक्रमअन्तर्गत पालिकाभित्रका २ सय ७० जना ज्येष्ठ नागरिकलाई सम्मान गरिनेछ ।
सरकारले प्रदान गर्दै आएको सामाजिक सुरक्षा भत्ता विवरणको आधारमा ज्येष्ठ नागरिकको पहिचान गरिएको काफ्लेले जानकारी दिइन् । गत वर्ष ९० वर्षमाथिका १ सयभन्दा बढी ज्येष्ठ नागरिकलाई सम्मान गरिएको थियो ।
प्रदेश १ सरकारले पठाएको ज्येष्ठ सम्मानबापतको नगद ५ हजार रुपैयाँमा पालिकाले न्यानो सिरक थपेर वितरण गरेको उनले बताइन् ।