close

खाता खोल्न घरघर पुग्दै सिरिजङ्घाका जनप्रतिनिधि

खाता खोल्न घरघर पुग्दै सिरिजङ्घाका जनप्रतिनिधि

Trulli
ADVERTISEMENT

ताप्लेजुङ– सामाजिक सुरक्षा भत्ता बैंकमार्फत नै वितरण गर्ने व्यवस्थाका लागि प्रक्रिया सुरु गरेको सिरिजङ्घा गाउँपालिकाले वडा नं. ३ सिकैचाका प्रत्येक घरधुरीमा पुगेर बैंक खाता संचालनमा ल्याएको छ ।


सिरिजङ्घा गाउँपालिकामा संचालनमा रहेको नेपाल बैंक लिमिटेडका कर्मचारी जनप्रतिनिधिसहित सामाजिक सुरक्षा भत्ता पाउने सिकैचाका प्रत्येक घर पुगेका छन् । घरघरमै गएर सामाजिक सुरक्षा भत्ता वितरण गर्न खाता संचालनमा ल्याउने गरी घरघरमै गई खाता खोलिएको वडा अध्यक्ष सन्तोष चाम्लिङले जानकारी दिए ।


नेपाल सरकारले अब बैंकमार्फत नै सामाजिक सुरक्षा भत्ता वितरण गर्नुपर्ने अनिवार्य व्यवस्था गरिसकेको छ । आउँदो वर्षको मंसिर महिनादेखि देशभरका सबै स्थानीय तहले अनिवार्य रूपमा बैंकिङ् प्रणालीमार्फत मात्र सामाजिक सुरक्षा भत्ता वितरण गर्न पाउने प्रावधान छ । सरकारले गत मंसिर महिनादेखि स्थानीय तह तोकेरै अनिवार्य रूपमा बैंकमार्फत मात्र सामाजिक सुरक्षा भत्ता वितरणको प्रावधान सुरु गरेको छ ।


सिरिजङ्घा गाउँपालिकाका प्रमुख प्रशासकीय अधिकृत सन्तोष घिमिरेले पालिकाभरको सामाजिक सुरक्षा भत्ता अनिवार्य बैंकमार्फत मात्र वितरणको व्यवस्था भइरहेको बताए । ‘यो प्रक्रिया द्रुत गतिमा अघि बढिरहेको छ’, उनले भने ।