चैत १२, २०८०
असोज ०५, २०७७
म्याग्दी– बेनी नगरपालिका–६ डम्मराका बासिन्दाले म्याग्दीका तीन वटा स्थानीय तहलाई सदरमुकामसँग जोड्ने बेनी–दरवाङ सडक बन्द गराएका छन् ।
ठेकेदारले मर्मत र जोखिममा परेका बस्ती संरक्षणमा बेवास्ता गरेको भन्दै उनीहरूले सडक अवरुद्ध पारेका हुन् ।
ठेकेदारले भत्काएको सडक मर्मत तथा जोखिममा परेको बस्तीको संरक्षणमा बेवास्ता गरेकाले सडक बन्द गराएर आन्दोलनमा उत्रनु परेको स्थानीय विशाल खत्रीले बताए ।
‘जथाभावी सडक निर्माण गरेका कारण दर्जनांै घर भत्कने अवस्थामा छन्,’ उनले भने, ‘हिलाम्मे सडक मर्मतमा पनि वास्ता नगरेपछि बाध्य भएर आन्दोलन गर्नु परेको हो ।’ सडक बन्द हुँदा मंगला, मालिका र धवलागिरी गाउपालिकाका बासिन्दालाई आउजाउका साथै ढुवानी प्रभावित भएको छ ।
बेनी–दरवाङ सडक स्तरोन्नति आयोजना सञ्चालन गरेको पूर्वाधार विकास कार्यालय म्याग्दीका प्रमुख नारायण पौडेलले ठेकेदार नै सम्पर्कमा नभएकाले मर्मत तथा जोखिमयुक्त ठाउँमा संरक्षणको काम गर्न समस्या भएको बताए ।
‘बल्लबल्ल डोजर अपरेटर खोजेर पल्टिन लागेको पर्खाल हटाउन पठाउँदै छौं,’ उनले भने, ‘लकडाउन भएपछि गएका ठेकेदार सम्पर्कमै छैनन् । पहिरोले छियाछिया बनाएको छ । मर्मत गर्न समस्या भएको छ ।’
०६३ मा ट्रयाक खुलेको करिब डेढ दशकसम्म पनि स्तरोन्नतिले पूर्णता नपाउँदा पश्चिम म्याग्दीको ‘लाइफ लाइन’ मानिएको यो सडकमा जोखिमपूर्ण यात्रा गर्नुपर्ने बाध्यता छ ।
ट्रयाक खुलेलगत्तै तत्कालीन विकेन्द्रित ग्रामीण पूर्वाधार निर्माण तथा जीविकोपार्जन सुधार कार्यक्रम (ड्रिलीप) ले करोडांै खर्चेर सञ्चालन गरेको सडक सुधारको काम प्रभावकारी हुन सकेको छैन ।
२०७४ देखि सडक डिभिजनले कालोपत्रेका लागि सुरु गरेको स्तरोन्नतिको कामले पनि गति लिन सकेको छैन ।
यात्रुहरू साँघुरो, खाल्डाखुल्डी, ग्रेड र मोड सुधार नभएको जीर्ण सडकमा जोखिम मोलेरै यात्रा गर्न बाध्य छन् । २४ किलोमिटर दूरीको यो सडक पार गर्न गाडीमा ३ घन्टासम्म लाग्छ ।
बर्खामा हिलो र हिउँदमा धुलोले हैरान बनाएको छ । तत्कालीन सडक डिभिजन कार्यालय बागलुङले ४ असोज, २०७४ मा बेनीदेखि बाबियाचौर खण्डको १३ किलोमिटर सडक कालोपत्रे गर्न समानान्तर लामा जेभीसँग ४५ करोड ५३ लाख ७२ हजार रुपैयाँमा ठेक्का सम्झौता गरेको थियो ।
सम्झौताअनुसार ४ माघ २०७६ मा सकिनुपर्ने यो आयोजनाको असार मसान्तको भौतिक प्रगति करिब ५० प्रतिशत छ । संघबाट २०७५ पुसमा प्रदेशको पूर्वाधार विकास कार्यालयलाई हस्तान्तरण भएको थियो ।
आयोजना ठेकेदारले पर्याप्त मजदुर र उपकरण परिचालन गर्न नसक्दा काम सुस्त बनेको कार्यालयका प्राविधिकहरूले बताएका छन् ।
११ मिटर फराकिलो बनाइने सडकको सात मिटर चौडाइ कालोपत्रे गर्न लागिएको हो । लाम्पाटादेखि दरवाङ खण्डको ८ किलोमिटर खण्डको सडक कालोपत्रे गर्न २२ करोड ५७ लाख ९३२ रुपैयाँमा ०७६ जेठ ३१ मा ठेक्का सम्झौता गरेको बिरुवा–क्याराभान जेभीले पनि कामलाई गति दिन सकेको छैन ।
सोही सडकको दुखुखोलामा करिब दश वर्षपछि मोटरेबल पुल निर्माण भएको छ । बेनी–दरवाङ सडक कालोपत्रे भएमा आवत जावत र ढुवानी सहज बन्नुका साथै म्याग्दीको पश्चिमी क्षेत्रको पूर्वाधार, आर्थिक सामाजिक विकासमा महत्वपूर्ण योगदान पुग्ने अपेक्षा छ ।
चैत १९, २०८०
चैत १९, २०८०
चैत २२, २०८०
चैत १८, २०८०
