रूपन्देही– महिला जनप्रतिनिधिलाई उद्यमशील बनाउने अभियानमा सक्रिय संस्था महिला उद्यमशील प्रवद्र्धन नेपालले दिगो विकासका लक्ष्य विषयक एकदिवसीय अनुशिक्षण कार्यक्रम रूपन्देहीको कोटहीमाई गाउँपालिकामा सम्पन्न भएको छ ।
कार्यक्रमलाई लुमन्ती आवासका लागि सहयोग समूहको आर्थिक एवं प्राविधिक सहयोग रहेको छ । कार्यक्रममा दिगो विकासका १७ लक्ष्य (२०१६ देखि २०३०) सम्बन्धी अनुशिक्षण बेनुमाया गुरुङले गराएकी थिइन् ।
उक्त अनुशिक्षण कार्यक्रममा महिला उद्यमशीलता प्रवद्र्धन नेपालकी उपाध्यक्ष एवं तिलोत्तमा नगरपालिका उपप्रमुख जगेश्वरदेवी चौधरीले स्वागत गरेकी थिइन् ।
संस्थाकी अध्यक्ष एवं बुटवल उपमहानगर उपप्रमुख गुमादेवी आचार्यले संस्थाबारे सहभागीलाई परिचय गराएकी थिइन् ।कोटहीमाई गाउँपालिका अध्यक्ष चन्द्रभूषण यादवले महिलाको सशक्तीकरणका र नेतृत्व विकासका निम्ति महिला उद्यमशीलता प्रवद्र्धन नेपाल दरिलो संस्थाको रूपमा स्थापित हुनुपर्ने बताए ।
स्थानीय महिलालाई स्वरोजगारी र आयमुखी बनाउनुपर्नेमा उनले जोड दिए । कार्यक्रम सञ्चालन संस्थाकी कोषाध्यक्ष एवं देवदह नगरपालिका उपप्रमुख विद्यालक्ष्मी गुरुङले गरेकी थिइन् । सहभागी सबैलाई कोटहीमाई गाउँपालिकाकी उपाध्यक्ष भानुमति बानियाले सम्मान गरेकी थिइन् ।
महिला जनप्रतिनिधिलाई उद्यमशील बनाउने अभियानमा सक्रिय संस्थाले रूपन्देहीका सबै नगरपालिकामा छलफल गरेका छन् । तालिममा बुटबल तिलोत्तमा, देवदह, सैनामैना, सिद्धार्थनगर, सियारी, मायादेवी, कोटहीमाई, ओमसतिया पालिकाका उपप्रमुख सहभागी थिए ।