रूपन्देही– रूपन्देहीको बुटवल उपमहानगरको नगर खेलकुद विकास समितिको आयोजनामा दोस्रो नगरस्तरीय राष्ट्रपति रनिङ सिल्ड प्रतियोगिता सुरु भएको छ ।

उपमहानगरको वडा नम्बर ११ एन्फा एकेडेमी कम्प्लेक्स तथा मैदानमा बुटवल उपमहानगर प्रमुख शिवराज सुवेदीले उक्त प्रतियोगिताको शुभारम्भ गरे । बुटवल उपमहानगरको नगर खेलकुद विकास समितिको आयोजनामा सुरु भएको प्रतियोगिता १० फागुनसम्म चल्नेछ । 

उद्घाटन अवसरमा प्रमुख सुवेदीले उपमहानगरले खेलकुद क्षेत्रलाई समृद्धिकै आधारका रूपमा लिएर सोहीअनुरूप महत्त्व दिएको बताए ।  पूर्वाधार विकासदेखि खेलाडीको पहिचान, प्रतिभा प्रस्फुटनदेखि दक्ष प्रशिक्षकको व्यवस्थासम्मका काममा विशेष चासो दिएको उनले जानकारी दिए । 

त्यस अवसरमा उपप्रमुख गुमादेवी आचार्य, सामाजिक विकास समिति प्रमुख सीता थापा आचार्य, विभिन्न राजनीतिक दलका प्रतिनिधि, पत्रकार महासंघ लुम्बिनी प्रदेशका उपाध्यक्ष भरत केसीलगायतले प्रतियोगिता सफलताको कामना गरे । 

खेलकुदको विकासका लागि उपमहानगरले सुरु गरेको अभियान सकारात्मक रहेकाले त्यसलाई साकार पार्न राजनीतिक दल, निजी क्षेत्र र नागरिक अगुवासँग पनि सहकार्य गर्न जरुरी रहेको सहभागीको जोड थियो ।

उद्घाटन सत्रमा बुटवलका सामुदायिक र संस्थागत विद्यालयका विद्यार्थीले विशेष झाँकीसमेत प्रदर्शन गरे । नगरभित्रका १८ वटा सामुदायिक र ११ वटा निजी गरी कुल २९ वटा विद्यालयका करिब १ हजार ३ सय ३४ जना खेलाडीको सहभागिता रहेको समितिका अध्यक्ष नन्दु काउचाले जानकारी दिए