भक्तपुर– भक्तपुर नगरपालिकाको वडा नम्बर १ को आयोजनामा सञ्चालित ३ दिने कौसी खेती तालिम सम्पन्न भएको छ । १४ देखि १६ फागुनसम्म कौसी खेती तालिम सञ्चालन भएको हो । 

तालिममा सहभागीलाई नगरप्रमुख सुनील प्रजापतिले प्रमाणपत्र वितरण गरे । नगरभित्र खेतीयोग्य जमिन अभाव भएपछि वडाले कौसी खेतीको तालिम दिएको हो । तालिममा २१ जना सहभागी थिए ।

कार्यक्रममा प्रमुख प्रजापतिले भक्तपुर नगरपालिकाले नगरबासीलाई लक्षित गरेर जीवनोपयोगी सीपमूलक तालिम प्रदान गर्दै आइरहेको बताए । उनले खेतीयोग्य जमिन कम हुँदै गइरहेको अवस्थामा कौसी खेतीलाई नयाँ विकल्पको रूपमा लिन सहभागीलाई आग्रह गरे ।

कौसीमा गरिने खेतीले वरिपरिको वातावरणमा हरियाली थप्नुका साथै फोहोर व्यवस्थापनमा सहयोग पुर्‍याउने नगरप्रमुख प्रजापतिको भनाइ छ । वडा नम्बर १ का वडाध्यक्ष श्यामकृष्ण खत्रीले भक्तपुरले सञ्चालन गरिरहेको सीपमूलक तालिमबाट सिकेको ज्ञान र सीपलाई सदुपयोग गर्न आग्रह गरे ।

कौसी खेती तालिमका प्रशिक्षक सविन ख्याजुले जथाभावी कौसी खेती गरिँदा पानी चुहिने, घर चर्कने आदि समस्या आउन सक्नेतर्फ सचेत गराउँदै प्राविधिक सल्लाहमा काउली, सागलगायतका खेती गर्नु उपयुक्त हुने सुझाव दिए ।