जुम्ला– जुम्लाको सिंजा गाउँपालिकाको नराकोटमा आँखा उपचार केन्द्र स्थापना गरिएको छ । गाउँपालिका र नेपाल नेत्रज्योति संघको समन्वयमा आँखा उपचार केन्द्र स्थापना गरिएको हो । 

गाउँपालिका अध्यक्ष देवलसिंह रावलका अनुसार आँखा उपचार केन्द्रमा काम गर्ने कर्मचारी र भवन व्यवस्थापन गाउँपालिका स्थानीय सरकारले गरेका हो । उनले भने, ‘केन्द्रमा उपकरणको व्यवस्थापन भने नेपाल नेत्रज्योति संघले गरेको हो । तत्कालीन आँखा उपचार केन्द्र सञ्चालन गर्न गाउँपालिकाले आँखा उपचारसम्बन्धी १ जना नायब सुब्बा स्तरका कर्मचारी व्यवस्थापन गरेका छौँ ।’ 

संघीय संरचना अनुसार सिंजा भेग (तिला, हिमा, सिंजा र कनकासुन्दरी गाउँपालिका) निर्वाचन क्षेत्र नम्बर (ख) मा पर्दछ । गाउँपालिका प्रवक्ता तथा वडाध्यक्ष नवीन शर्माका अनुसार यहाँका नागरिकले आँखा उपचारका लागि लामो दूरीमा रहेको जुम्ला सदरमुकाम निर्वाचन क्षेत्र नम्बर (क) खलंगास्थित आँखा उपचार केन्द्रमा उपचार गराउँदै आएका थिए । 

नजिककै आँखा उपचार केन्द्र सञ्चालनमा आएपछि यहाँका ज्येष्ठ नागरिक तथा आँखासम्बन्धी बिरामी व्यक्तिले नजिकै उपचार पाउनेछन् । विशेषगरी यो आँखा उपचार केन्द्रमा हिमा, सिंजा र कनकासुन्दरी गाउँपालिकाका नागरिकलाई सहज हुने वडाध्यक्ष शर्माले बताए ।