रूपन्देही– नेकपा माओवादी केन्द्रका अध्यक्ष पुष्पकमल दाहाल प्रचण्डले देशमा फेरि एक पटक अनिष्ट निम्त्याउन खोजिएको बताएका छन् ।

राष्ट्रिय दलित पत्रकार संघ नेपालको बुटवलमा प्रथम महाधिवेशन उद्घाटन कार्यक्रमलाई सम्बोधन गर्दै अध्यक्ष प्रचण्डले पछिल्लो केही समययता देशमा परिवर्तनलाई उल्ट्याउने प्रयत्न भइरहेको दाबी गरेका हुन् ।

देशमा संविधानलाई रक्षा गर्ने वा हत्या गर्ने भन्ने बहस सुरु भइसकेको प्रचण्डले बताए । उनले भने, ‘संविधानमा नपुगेका कुरालाई थप गर्दै लैजाने कि अहिलेका उपलब्धिलाई हत्या गर्ने भन्ने बहस जारी छ ।’

अहिलेसम्मका आन्दोलन र क्रान्तिबाट प्राप्त उपलब्धिलाई उल्ट्याउन षडयन्त्र गरिएको उनको धारणा छ । संविधान र संघीय लोकतान्त्रिक गणतन्त्रलाई सिध्याउने प्रयास भइरहेको अध्यक्ष प्रचण्डले बताए ।'

७० वर्षदेखि लडेर ल्याएको संविधानलाई ध्वंस गर्ने प्रयत्नविरुद्ध फेरि एक पटक क्रान्तिको आँधीबेहरी ल्याउनुपर्ने प्रचण्डले वताए । उनले भने, अहिले विश्वभर चलिरहेको छ, कलरफुल रिभोलुसन । क्रान्तिलाई पूरा गर्न नेपालमा पनि शान्तिपूर्ण कलर रिभोलुसन आवश्यक छ । परिवर्तन उल्ट्याउन खोज्नेविरुद्ध शान्तिपूर्ण क्रान्ति गरिन्छ ।’

प्रचण्डले सर्वोच्च अदालतले नेपाल कम्युनिस्ट पार्टी खारेजीको सम्बन्धमा गरेको फैसलाप्रति संकेत गर्दै जन्मिसकेको बच्चालाई पुनः गर्भमा पठाउन खोजिएको टिप्पणी गरे । उनले भने, ‘यस्तो अचम्म पनि हुँदो रहेछ । अनौठो परिघटना पनि हुँदो रहेछ । यसबाट पनि पुष्टि हुन्छ, केही अनिष्ट त हुँदै छ, देशमा । अझै कति अस्वाभाविक परिघटना देख्नुपर्ने हो ।’

अध्यक्ष प्रचण्डले अहिले सबैभन्दा धेरै घेराबन्दी आफूमाथि भएको पनि दाबी गरे । ‘प्रतिगामी र परिवर्तन विरोधीले, संघीयता, गणतन्त्र, समानुपातिक, समावेशी मन नपराउने देशी–विदेशी शक्ति सबै मिलेर यो परिवर्तनका लागि अग्रगामी भूमिका खेल्ने नेताहरूको बदनाम गर्ने कोसिस भइरहेको छ । त्यसका लागि अहिले सबैभन्दा धेरै घेराबन्दी मैमाथि भएको छ’, प्रचण्डले भने ।