पर्वत– पर्वतको जलजला गाउँपालिकाको पर्वतबेनीमा खानेपानी सुविधासँगै सामाजिक झैझगडा न्यून भएको छ । 

तीव्र बजारीकरण भइरहेको वारिबेनीमा मागअनुसार आपूर्ति नहुँदा खानेपानी उपभोगको विषयले समाजमा द्वन्द्व सिर्जना भएको थियो । 

लिफ्ट खानेपानी आयोजनामार्फत कालीगण्डकी किनारको पानी तानेर प्रशोधन गरी घरघरमा बनाइएको धाराबाट वितरण गर्न थालिएपछि सामाजिक झगडा हटेको वारिबेनी टोल सुधार समितिका अध्यक्ष शिवबहादुर कार्कीले बताए । 

‘सार्वजनिक धारा र निजी मुहानको सीमित पानी उपभोग गर्ने विषयमा उत्पन्न विवादले झैझगडा र कुटाकुटसमेत हुन्थ्यो’, पर्वतबेनी खानेपानी उपभोक्ता संस्थाका सचिवसमेत रहेका उनले भने, ‘नयाँ आयोजना बनेपछि पानीका कारणले विवाद, झगडा हुन छाडेको छ ।’ 

खानेपानी तथा ढल निकास विभागको सहरीकरण उन्मुख बस्तीहरूका लागि सञ्चालित सहलगानी कार्यक्रमअन्तर्गत जलजला गाउँपालिकाको २, ३ र ४ नम्बर वडालाई समेट्ने पर्वतबेनी खानेपानी तथा सरसफाइ आयोजना १२ करोड ४३ लाख रुपैयाँको लागतमा निर्माण भएको हो । 

सरकारको ७० र उपभोक्ताको ३० प्रतिशत लगानीमा २०७४ देखि निर्माण सुरु भएको आयोजनाबाट बगरफाँट, वारिबेनी र लामाखेतका ६२६ घरमा निजी धारा जडान गरेर खानेपानी वितरण गरिएको पर्वतबेनी खानेपानी तथा सरसफाइ उपभोक्ता संस्थाका अध्यक्ष लोकनाथ रेग्मीले जानकारी दिए ।
 
‘७३७ घरधुरी आबद्ध भएका छन्’, उनले भने, ‘कालीगण्डकी नदी किनारको जुगेधाराबाट सम्पवयलको सहायताले आँटरीमा रहेको रिजर्भ ट्यांकीमा प्रतिसेकेन्ड १२ लिटरका दरले पानी तानेर आपूर्ति गराइएको छ । आँटरीको मुहानको पानी पनि मिसाइएको छ ।’ 

जलजला गाउँपालिकाको सबैभन्दा ठूलो यो आयोजना जिल्लाको दोस्रो ठूलो हो । सबै उपभोक्ताको घरमा निजी धारा जडान गरेर खानेपानी वितरणको व्यवस्था मिलाइएको अध्यक्ष रेग्मीले बताए । 

तीव्र रूपमा बस्ती बिकास भएको बगरफाँट, पर्वतबेनी र लामाखेतमा यसअघि निजी मुहान र सार्वजनिक धाराबाट खानेपानी वितरण हँुदै आएको थियो । सार्वजनिक धारामा पानी भर्न घन्टौ समय पालो कुर्नैपर्ने समस्या थियो । 

निजी मुहानको पानी पाइपबाट ल्याउन पालो पर्खनुपर्दा हुने समय बचत भएको स्थानीय श्याम रेग्मीले सुनाए । ‘पानीका कारणले विवाद र समयको बर्वादी भएको थियो’, उनले भने, ‘अहिले घर, टोल र बजार सफा भएको छ । शान्ति र मेलमिलाप भएको छ ।’ 

जलजला गाउँपालिका अध्यक्ष यामबहादुर मल्लले आयोजनालाई पूर्णता दिएर थप व्यवस्थित गर्न संस्था र खानेपानी डिभिजन कार्यालयसँग समन्वय गरेको बताए । जलजलाको वडा नम्बर ३ का वडाध्यक्ष रवि भण्डारीले महसुल समायोजन गर्नुपर्ने उपभोक्ताको अपेक्षा रहेको जानकारी दिए ।