दाङ– दाङको राप्ती गाउँपालिकाले लैंगिक हिंसामा परेका नागरिकलाई न्याय दिलाउने उद्देश्यले तथ्यांक लिन सुरु गरेको छ । 

महिला, बालबालिका तथा ज्येष्ठ नागरिक मन्त्रालय र राप्तीको महिला, बालबालिका तथा ज्येष्ठ नागरिक शाखाको संयुक्त पहलमा घरधुरी सर्वेक्षणमार्फत तथ्यांक लिन थालिएको हो । गाउँपालिकाका ९ वटै बडामा निगरानी समूह, महिला समूहद्वारा लैंगिक हिंसामा परेका नागरिकको तथ्यांक लिने काम सुरु गरिएको छ । 

तथ्यांक लिने काम अन्तिम चरणमा पुगेको र पीडितको अवस्थाको आधारमा कानुनी उपचार वा परामर्श दिन लैंगिक हिंसामा परेका नागरिकको तथ्यांक लिइएको राप्ती गाउँपालिका न्यायिक समिति संयोजक तथा उपाध्यक्ष जगदम्बाकुमारी चौधरीले जानकारी दिइन् ।

सेफ हाउस सञ्चालनमा

न्यायिक समिति संयोजक तथा उपाध्यक्ष चौधरीले गाउँपालिकाले माहुरी होम संस्थासँगको समन्वयमा लैंगिक हिंसापीडितलाई सुरक्षित राख्न सेफ हाउससमेत सञ्चालन गरेको बताइन् । 

सेफ हाउस अवलोकनका क्रममा उपाध्यक्ष चौधरी, वडा नम्बर ४ का वडाध्यक्ष विष्णुबहादुर घर्ती जिसीले समाजमा हुने हिंसामा परेर पीडित भएको अवस्थामा नजिकैको निगरानी समूह, वडा कार्यालय, गाउँपालिका, प्रहरी चौकीको सम्पर्कमा आउनसमेत सबै पीडितलाई अनुरोध गरे ।राप्तीको वडा नम्बर ४ मौरीघाटमा सेफ हाउस सञ्चालनमा ल्याइएको छ ।