जुम्ला– जुम्लाका कोरोना संक्रमित होम आइसोलसनमा बस्न थालेपछि गाउँमा संक्रमणको जोखिम बढेको भन्दै तत्काल संस्थागत आइसोलेसन बनाउन जोड दिइएको छ । 

हाल जुम्लाका अधिकांश संक्रमित होम आइसोलेसनमा नाममा घरमै बसेका छन् । कोरोना रोकथाम, नियन्त्रण गर्न प्रभावकारी समन्वय र सहयोगको विषयमा छलफल गर्न आयोजित बैठकमा होम आइसोलेसनका कारण जुम्लाका कोरोनाको उच्च जोखिममा रहेको बताइयो । 

संविधानसभा सदस्य ललितजङ शाहीले होम आइसोलेसनका कारण संक्रमण फैलिएको बताए । उनले भने, ‘हाम्रोजस्तो संरचना भएका घरमा होम आइसोलेसनको नीति वैज्ञानिक छैन । तत्काल जुम्लाका सबै स्थानीय तहले संस्थागत आइसोलेसन बनाउनुपर्छ । जुम्लालाई कोरोनामुक्त जिल्ला बनाउन चिन्ता र चासोका साथ लाग्नुपर्छ । कोरोनाबाट जुम्ला सुरक्षित रहन सक्दैन ।’

शाहीले चन्दननाथ नगरपालिकाको संक्रमण दर उच्च रहेको र संस्थागत आइसोलेसन बनाउन आनकानी गरेको देखिएकाले संक्रमण रोक्न संस्थागत आइसोलेसन बनाउन सुझाए ।

बैठकमा जिल्ला समन्वय समितिका प्रमुख लालबहादुर सार्कीले संस्थागत आइसोलेसन निर्माणका लागि अन्य स्थानीय तहभन्दा नगरपालिकालाई जोड दिनुपर्ने बताए । ‘जनघनत्व बढी भएको र भीडभाड हुने क्षेत्र भएकाले संक्रमण दर पनि उच्च छ’, प्रमुख सार्कीले भने, ‘बरु संस्थागत आइसोलेसन निर्माणका लागि संघीय तथा तथा प्रदेश सरकालाई बजेट व्यवस्था गर्न आग्रह गरौँला । तर, नगरभित्र मापदण्डसहितको आइसोलेसन अनिवार्य बनाउनुपर्छ ।’

बैठकमा सहभागी सबैले होम आइसोलेसनले संक्रमण तीव्र रूपमा फैलँदो क्रममा रहेकाले संस्थागत आइसोलेसन बनाउनुपर्नेमा जोड दिए ।

जिल्लामा बनेका आइसोलेसन प्रयोगमा ल्याउनुपर्ने र नबनेका स्थानीय तहमा संस्थागत आइसोलेसन बनाउनुपर्ने उनीहरूको भनाइ थियो ।
जुम्लाका प्रमुख जिल्ला अधिकारी भूपेन्द्र थापाले संस्थागत आइसोलेसन निर्माणमा जोड दिए । उनले भने, ‘कोरोना संक्रमण रोक्न सबै तह र तप्काको सहयोगको खाँचो छ । होम आइसोलेसनमा जोड दिएर नागरिकको स्वास्थ्य अधिकारमाथि खेलबाड नगरौँ । संस्थागत आइसोलेसन बनाऔँ । संक्रमित राखेर कोरोनामुक्त भएपछि घर पठाउने व्यवस्था गर्नु उपयुक्त हुनेछ ।’

चन्दननाथ नगरपालिका प्रमुख कान्तिका सेजुवालले नगरको आवश्यकताअनुसार संस्थागत आइसोलेसन बनाउने प्रक्रिया सुरु गर्ने बताइन् । उनले भनिन्, ‘अब संस्थागत आइसोलेसन बनाउन जुट्छौँ । सबैले साथ र सहयोग गर्नुहोला ।’  

शवघाट बनाउने निर्णय 
 

कोरोना रोकथाम र नियन्त्रण गर्न प्रभावकारी समन्वय र सहयोगको विषयमा छलफल गर्न आयोजित बैठकले जुम्लाको चन्दननाथ नगरपालिकाको उमगाड र दानसाँघु क्षेत्रमा शवघाट बनाउने निर्णय भएको छ । त्यसका लागि चन्दननाथ वडा नम्रब १ र ९ नम्बर वडा कार्यालयलाई अनुरोध गर्ने निर्णय भएको हो । 

यसअघि जुम्लामा शवघाटको अन्योलले संक्रमितको मृत्यु भए कहाँ लैजाने भन्ने समस्या थियो । अब त्यो समस्या निर्णयपछि समाधान हुनेछ ।बैठकले चन्दननाथ नगरपालिकाले तत्काल उद्योग वाणिज्य संघको हलमा आवश्यकताअनुसार संस्थागत आइसोलेसन तयार गर्ने निर्णय गरेको छ ।

उद्योग वाणिज्य संघ जुम्लाले संस्थागत आइसोलेसन निर्माणका लागि हल खाली रहेको यसअघि बसेको डिसिसिएमसीको बैठकमा जानकारी गराएको थियो । अब त्यो हलमा चन्दननाथ नगरपालिको संस्थागत आइसोलेसन बनाइने भएको हो ।

प्रमुख जिल्ला अधिकारी थापाले जिल्लास्थित गैरसरकारी संस्थाले कोभिड रोकथाम तथा नियन्त्रणका लागि गर्न सक्ने आवश्यक सहयोगको अनुमानित लागतको विवरण ३ दिनभित्र डिसिसिएमसीलाई पेस गर्ने निर्णय भएको जानकारी दिए । उनले भने, ‘कोरोना कहरका बेला एकद्वार प्रणालीबमोजिम काम गर्नुपर्ने अवस्था छ । यो समय सबै हातेमालो गरेर अघि बढे कोरोना जित्न सकिन्छ ।’ 

कोभिडका कारण रोजगारी गुमेका अतिविपन्नलाई दिने राहत एकद्वार प्रणालीबाट वितरण गर्ने निर्णय भएको प्रमुख जिल्ला अधिकारी थापाले बताए ।