जुम्ला– जुम्लाको कनकासुन्दरी गाउँपालिकास्थित हाँडसिजा स्वास्थ्य चौकीको आइसोलेसन कक्षमा उपचारर्थ कोरोना संक्रमित निको भएपछि फूलमाला लगाएर घर फर्काइएको छ । आइसोलेन कक्षमा बसेका १९ जना संक्रमित निको भएपछि ६ जेठमा फूलमालासहित बिदाबारी गरेर घर पठाइएको हो ।
हाँडसिंजा स्वास्थ्य चौकी इन्चार्ज वीरेन्द्रप्रसाद उपाध्यायका अनुसार जनस्वास्थ्य कार्यालय जुम्लाको टोली आएर संक्रमितलाई पुनः एन्टिजेट परीक्षण गर्दा रिपोर्ट नेगेटिभ आएपछि उनीहरूलाई घर पठाइएको हो । उनले भने, ‘घर पठाएकालाई अझै पनि घरमा १ साता होम आइसोलेसन बस्न सुझाएका छौँ । उनीहरूको मनोबल उच्च बनाउन हौसलास्वरूप फूलमाला लगाइदिएका हौँ ।’
संक्रमितसहित उनीहरूको घरपरिवार, छरछिमेकमा सम्पर्कमा रहेका ८६ जनालाई कन्ट्याक टे«सिङ एन्टिजेट परीक्षण गर्दा सबैको रिपोर्ट नेगेटिभ आएको उनले जानकारी दिए । कनकासुन्दरीभित्र विभिन्न बस्तीमा अब ११ जना संक्रमित होम आइसोसनमा छन् । तिनीहरू पनि स्वास्थ्यकर्मीको सम्पर्कमै रहेको उपाध्यायले बताए । उनीहरूको स्वास्थ्य अवस्था सामान्य रहेकाले निको हुने क्रममा रहेको उनको भनाइ
छ ।
गाउँपालिकाले कोटघर स्वास्थ्य चौकीमा २५ बेड र हाँडसिंजा स्वास्थ्य चौकीमा २५ बेड गरी ५० बेडको आइसोलेसन कक्ष सञ्चालनमा ल्याएको इन्चार्ज उपाध्यायले बताए । यसमा थप ५ बेडको अस्थायी कोभिड अस्पताल पनि सञ्चालनमा छ ।
कर्णाली स्वास्थ्य विज्ञान प्रतिष्ठान जुम्लाले स्थानीय तहमा चिकित्सक परिचालन गर्ने भने पनि अहिलेसम्म चिकित्सक आइपुगेका छैनन् ।
जिल्लाभर संक्रमित भएका ११४ जना निको भएर घर फर्किएका छन् । वैशाख पहिलो सातादेखि हालसम्म कोरोना संक्रमितको संख्या ३११ पुगेको जिल्ला प्रशासन कार्यालय जुम्लाले ६ जेठमा सार्वजनिक गरेको तथ्यांक उल्लेख छ ।
यसमध्ये ११४ जना निको भएको प्रमुख जिल्ला अधिकारी भूपेन्द्र थापाले बताए । उनले भने, ‘यहाँ १९७ जना सक्रिय संक्रमित छन् । कर्णाली स्वास्थ्य विज्ञान प्रतिष्ठान शिक्षण अस्पताल जुम्लाको आइसोलेसनमा २१ जना संक्रमितको उपचार भइरहेको छ ।’