सोलुकुम्बु जिल्लाको लुखुपिके गाउँपालिकाका अध्यक्ष हुन् डम्बरबहादुर बस्नेत ।  विकास निर्माण र चालु खर्चको २० लाख रकम र विभिन्न शीर्षकमा रहेका काट्न मिल्ने रकमलाई काटेर ४० लाख हाराहारीको रकम पालिकाले अहिले स्वास्थ्य क्षेत्रमा लगाइरहेको अध्यक्ष बस्नेत बताउँछन् । तर, राजश्व बाँडफाँटबाट प्राप्त हुने अनुदान प्रदेश र केन्द्रबाट उपलब्ध नहुँदा पालिकामा समस्या भएको बस्नेतको गुनासो पनि छ । साथै बस्नेतसँग कोरोनाले पारेको प्रभाव, नियन्त्रण गर्न पालिकाले खेलेको भूमिका र अन्य विकास निर्माणमा पालिकाको प्रगतिका विषयमा पालिकाखबर बुलेटिनमा करिस्मा कार्कीले गरेको कुराकानी:

धेरैले सोलुखुम्बुमा महामारीले आक्रान्त पार्न नसक्ने आकलन गर्दा गर्दै हिमाली जिल्लामा पनि कोरानो संक्रमित पुष्टि भए । लिखुपिकेको अहिलेको अवस्था के हो ? कसरी कोरोना फैलियो ? 
हाम्रो गाउँपालिकाले दोस्रो लहरको महामारी नियन्त्रण गर्ने, सवाधानी अपनाउने प्रक्रिया अघि बढाउँदा बढाउँदै केही लिखुपिकेवासीको काठमाडौंबाट आवतजावत हुँदा संक्रमण फैलियो । अहिले २४ जना संक्रमित छन् । १३ जना उपचार पद्दतीबाट निको हुनुभएको छ । अन्यको हामीले स्वास्थ्य शाखालाई पूरा अधिकार दिएर नियन्त्रण ल्याउने प्रयास गरिरहेका छौँ । 

सक्रिय संक्रमित कति जना हुनुहुन्छ ? 
अहिले ९ जना मात्रै सक्रिय संक्रमित छन् ।

स्थानीय तहले महामारीमा तयारी गर्न नसक्दा अवस्था भयावह हुन पुग्यो । तपाईका लागि पनि छोटो समय मात्रै मिल्यो । महामारी नियन्त्रण गर्न भूमिका के खेल्नुभयो ? अहिलेसम्म केके गर्नुभयो ? 
हामीले गत वर्ष र अहिले गरेर ९ वटा अक्सिजन कन्सन्ट्रेटर खरिद गर्‍यौँ । १४ शय्या आइसोलेसन बनायौँ । हिमालयन प्राजेक्टसँगको समन्वयमा हामीलाई स्वास्थ्य सामग्री र अक्सिजन ४० लिटर उपलब्ध भयो । औषधि जति सबै कार्यपालिकाबाट निर्णय गरेर खरिद गरेर पाँच वटै वडामा रहेका स्वास्थ्य इकाइमा आवश्यक सबै सामग्री पुर्‍याएका छौँ । 

आइसोलेसन निर्माण देखि संक्रमितलाई घरमै गएर उपचार सेवा लगायतका काममा तपाईहरूको बजेट कति खर्च भयो ? विकास निर्माणमा गर्नुपर्ने खर्च महामारी नियन्त्रणमा हुँदा भोलि अरु योजनामा शोधभर्ना कसरी गर्नुहुन्छ ? 
अहिले हामीले गत वर्षकै नीति कार्यक्रममा विपद् न्यूनिकरणका लागि ५० लाखको कोष बनाएका थियौँ । अहिले विकास निर्माण र चालु खर्चको २० लाख रकम काटेर स्वास्थ्य क्षेत्रलाई दिएका छौँ । ४० लाखको हाराहारीमा विभिन्न शीर्षकमा रहेका रकमलाई, काट्न मिल्ने रकमलाई काटेर उपलब्ध गराएका छौँ । विकास निर्माणका योजनालाई अप्ठ्यारो छैन । तर, राजश्व बाँडफाँटबाट प्राप्त हुने अनुदान चाहिँ प्रदेश र केन्द्रबाट रकम उपलब्ध नहुँदा झन्झट बोकिरहेको छौँ । 

यो महामारीका बीचमा पूर्वाधार निर्माणमा त असर प¥यो होला । अहिले गत वर्षका योजना कति पूरा भए । नयाँ आर्थिक वर्ष सुरु हुन लाग्यो । बजेट ल्याउने चटारो पनि होला । के तयारी गरिरहनुभएको छ ? 
आगामी वर्षको नीति कार्यक्रम बनाउन मातहतका कार्यालय र वडाध्यक्षलाई भनेका छौँ ।गत वर्ष प्रक्रियामा रहेको योजना मध्ये ८५ प्रतिशत सफल भइसकेका छन् । १५ प्रतिशत निर्माण अध्ययनमा छन् । प्रधानमन्त्री रोजगार जस्ता कार्यक्रम प्रक्रियामा छन् । गाउँपालिकाले वडा र स्वास्थ्यका लागि गर्नुपर्ने नीतिगत काम गरिरहेका छौँ । 

अन्त्यमा, तपाईको कार्यकालमा यो पटक आउने बजेट अन्तिम होला । किनभने स्थानीय सरकारको कार्यकाल सकिँदैछ । योबीचमा तपाईले तपाईको पालिकाका लागि के गर्नुभयो, के गर्न पाउनुभएन ? समीक्षा गर्नसक्नुहुन्छ ? 
सबै जनताको आधारभूत चाहना अुनसार, सल्लाह अनुसार चार बजेट खर्च गर्‍यौँ । त्यो क्रममा दुई काम हुन सकेनन् । तर, एउटा काम एक हप्ता भित्र हुँदैछ । जग्गाको विवादले हामीले जग्गा नपाउँदा गाउँपालिकाको जमिनमा आफ्नो भवन भने बनाउन सकेका छैनौँ ।