ताप्लेजुङ– ताप्लेजुङको मैवाखोला गाउँपालिकाले किसानहरुलाई सहुलियतपूर्ण ऋण उपलब्ध गराउन कृषि कोष बनाउने भएको छ ।

निर्वाहमुखी कृषि प्रणालीलाइ व्यवसायिक र आधुनिकीकरण गर्न यो कोषमार्फत किसानलाइ सहुलियतपूर्ण ऋण उपलब्ध गराइने गाउँपालिका अध्यक्ष राजनकुमार थक्लुङले जानकारी दिए ।

कोष सञ्चालन तथा व्यवस्थापनकोकार्य कार्यविधिले स्पष्ट गर्ने थक्लुङले बताए । कोषमार्फत सहुलियतपूर्ण ऋण उपलब्ध हुने छ भने यसबाहेक गाउँपालिकाले किसानलाइ खाद्यान्नमा आत्मनिर्भर बनाउन समेत योजना तय गरेको छ ।

जसअन्र्तगत उन्नत जातका बीउ बिजन र कृषि उपकरण सामग्री निःशुल्क रुपमा बितरण गरिने छ । किसानलाइ प्रयोगात्मक कृषि पाठशाला सञ्चालन गरी व्यवसायिक ज्ञान र सीपको हस्तान्तरण गरिने छ ।  

माटो सुहाउँदो ठानिएको अकबरे खोर्सानीको उत्पादन र बजारीकरणलाई गाउँपालिकाकै एक मुख्य उत्पादनको रुपमा विकास गरिने छ ।

अकबरे खोर्सानीलाइ पूर्णतया अग्र्यानिक उत्पादन गर्ने प्रवन्ध मिलाइने छ । बाँझो जग्गाहरुमा दन्ते ओखर, एभोकाँडो, अंगुर, सुन्तला, कागती र किवी प्रजातिका फलफुल लगाउन किसानलाई प्रोत्साहित गरिने छ ।

भकारो सुधार कार्यक्रममार्फत जैविक मल उत्पादन गर्न किसानलाइ पशुपालनतर्फ समेत केन्द्रित गरिने गाउँपालिकाका प्रमुख प्रशासकीय अधिकृत देवी तुम्बापोले जानकारी दिए ।

‘अलैंची बगानमा कृषि प्राविधिक’ अभियान सञ्चालन गरी अलैंचीमा लाग्ने रोग र बगान व्यवस्थापनका कार्यमा कृषकलाई स्थलगत सहजीकरणको प्रवन्ध गरिएको गाउँपालिकाले जनाएको छ ।

अलैंची खेतीलाई थप व्यवस्थित र नयाँ बगान व्यवस्थापनका लागि ‘एक वडा, एक नर्सरी केन्द्र’ स्थापना गरिने छ । सोही नर्सरीमार्फत गाउँपालिकाका ६ वटै वडाका अलैंची किसानहरुलाई नयाँ बिरुवा बितरण गरिने योजना बनाइएको गाउँपालिकाले जनाएको छ । आलु खेतीमा टिस्यु कल्चर प्रविधि अपनाउने घोषणा गाउँपालिकाले गरेको छ ।