घरदैलो पुगेर भत्ता बाँड्दै नगर प्रमुख चौधरी


  • change font
  • change font
  • change font

उदयपुर– उदयपुरको त्रियुगा नगरपालिका प्रमुख बलदेव चौधरीले नगरभित्रका अशक्तलाई घरदैलोमै पुगेर सामाजिक सुरक्षा भत्ता वितरण गरेका छन् । नगर प्रमुख चौधरीले बैंकसम्म आउन नसक्ने अशक्तलाई घरघरमै पुगेर भत्ता वितरण गरेका हुन् । 

 

सन्राइज बैंक गाईघाट शाखाका म्यानेजर सञ्जय गेलालसहितको टोली बनाएर हिँडेका चौधरीले त्रियुगा नगरपालिका वडा नम्बर ७ गुण्डे चुहाडेकी अशक्त ७३ वर्षीया सनमाया दनुवारलाई घरमै पुगेर चार महिनाको १२ हजार रुपैयाँ भत्ता वितरण गरे ।

 

त्यसैगरी त्रियुगा नगरपालिका वडा नम्बर ७ तोरीबारीकी ७६ वर्षीया अशक्त मनमाया घिमिरेलाई पनि चौधरी घरमै पुगेर सामाजिक सुरक्षा भत्ता हस्तारण गरे ।

 

बैंकसम्म आएर सामाजिक सुरक्षा भत्ता लिन नसक्नेहाई वडाको समन्वयमा बैंक तथा नगरपालिकाले घरदैलोमै सामाजिक सुरक्षा भत्ता उपलब्ध गराउन थालेको नगर प्रमुख चौधरीले जानकारी दिए । नगरपालिकाले अशक्तलाई बैंक तथा वडाको समन्वयमा घरदैलोमै पुगेर सामाजिक सुरक्षा भत्ता दिँदै आएको छ ।

 

जनताको घरदैलोमा पुगेर सामाजिक सुरक्षा भत्ता उपलब्ध गराएपछि लाभग्राही खुसीले दंग छन् । आगामी दिनमा पनि अशक्त समूहका लक्षित वर्गलाई घरदैलोमै सेवा उपलब्ध गराउन व्यवस्था मिलाइने नगर प्रमुख चौधरीले बताए ।