कैलालीको जानकी गाउँपालिका अध्यक्ष प्रदीप कुमार चौधरीलाई पालिका बखर बुलेटिनका लागि करिष्मा कार्कीले पालिकाको बजेट कार्यान्वयन, कृषि, पूर्वाधारमा पालिकाले गरेको प्रगतिलगायतका विषयमा गरेको कुराकानी । 

पालिकाको आर्थिक वर्ष २०७८/७९ को बजेटका प्राथमिकता र नयाँ कार्यक्रमबारे बताइदिनुस् न ।

जानकी गाउँपालिकाको आगामी वर्षका लागि ७९ करोड ३ लाखको बजेट अनुमानित गरेका छौँ । जस अन्तर्गत हाम्रो महत्वकांक्षी योजना पनि छन् । हामीले एकदमै नयाँ प्रयोगका रुपमा ल्याउने प्रयास गरेका छौँ । केही पुरानालाई निरन्तरता दिएका छौँ । यद्यपि, जनतालाई सुविधा र विकासको अनुभूति गराउन नयाँ कार्यक्रम ल्याएका छाैँ ।

बिदेशवाट फर्किएका युवाका लागि करार खेतीका लागि प्रोत्साहन गर्ने नीति छ , करार खेती भनेको के हो ? 

करार खेती खासमा अदक्ष जनशक्तिलाई समूह बनाएर आएमा मागको आधारमा योजना र कार्यक्रम दिने हामीले नीति बनाएका छौँ । खासमा स्वरोजगार बनाउने हाम्रो नीति हो । 

शिक्षण सिकाइका लागि डिजिटल पाढ्यसामग्री प्रयोगमा ल्याउने भननु भएको छ । यो भनेको विद्यालयमा पठनपाठन हुने पुस्तकको डिजिटल भर्सन भनेको हो कि स्थानीय पाठ्यक्रमलाई डिजिटलाइजेसन गर्ने भन्नु भएको हो या अरु केही ? 

कोरोनाले गर्दा शिक्षा क्षेत्र अस्तव्यस्त बन्यो । त्यसैले अब वैकल्पिक विधि अपनाएर शिक्षण सिकाईको कार्य अघि बढाउने योजना बनाएका छौँ । अबको दिनमा प्रविधि मैत्री सिकाइ गर्न खोजेका हौँ । हामीले अडियोमार्फत विद्यार्थीलाई अध्यापन गराउने योजना बनाएका छौँ । जस्तै, हामीले एफएम मार्फत शिक्षण सिकाईको विधिलाई अवलम्बन गरेका छौँ । 

अलिकति पूर्वाधार विकासका कुरा गरौं, तपाईहरुले त गाउँ यातायत गुरु योजना नै बनाउनु भएको छ । यसले कसरी काम गरिरहेको छ ? 

हाम्रो गाउँपालिकामा हामी निर्वाचित भएर आएपछि हामीले पहिलो आर्थिक वर्षमा नै यो गुरुयोजना बनायौँ । टीकापुर लम्की सडकखण्ड र सेती लोकमार्ग यो पालिकासँग जोडिएकाले रिङ रोड बनाउने योजना अघि बढाएका हौँ । सरकारको मापदण्डलाई नै पालना गरेर न्यूनतम साढे ६ देखि ५० मिटरको बाटो बनाएका हौँ । 

यातायतबाहेक पूर्वाधार निर्माणका अन्य कस्ता क्षेत्र प्राथमिकतामा छन् तपाईंहरुका ? 

चार गाविस बनेर यो पालिका बनेको हो । एउटा प्रशासनिक भवन थियो । अरुको थिएन । त्यसैले हामीले वडा कार्यालय निर्माण गर्ने काम सुरु भएको छ । गाउँपालिकाको भवन अझै शिलान्यास गर्न सकेका छैनौँ । केहीले जग्गा दान गर्नुभएको छ । अब विस्तारै भवन निर्माणतर्फ हामी अघि बढ्छौँ । 

कार्यकालको अन्तिम बजेट भएकाले बहुवर्षिय नयाँ योजनामा लगानी नगर्ने भन्ने नीति हो तर तपाईहरुले त यसको पालना गर्नु भएन हैन ? 

चक्रपथलाई नियमित गर्नुपर्ने कामलाई अघि बढाउनु पर्नेछ । विद्यालय, भवन निर्माण हामीले हामै्र कार्यकालमा सक्नुपर्छ भन्ने चाहिँ लाग्दैन । 

ल्याण्ड पुलिङको नाममा जग्गा अधिग्रहण गर्ने नीति यो वर्ष नै सम्पन्न गर्ने हो र यो त बहुवर्षिय प्रकृतिको देखिन्छ नि ? 

नीतिमा त ल्याएका छौँ । तर, कार्यान्वयन गर्न सकेका छैनौँ । यहाँको राष्ट्रिय गौरवको आयोजना अघि बढाउने भनेपनि सरकारको नियमानुसार भूमि खण्डीकरण रोकिएको छ । हामीले अहिले नै तत्काल नै पूर्ण रूपमा लागु गर्नुपर्छ भन्ने सम्भावना देखिँदैन ।

अन्तमा, चार वर्षको अवधि कस्तो रह्यो, चुनावताका जनतामाझ गरेका प्रतिवद्धता कति पुरा गर्नुभयो कति बाँकी छ ? 

हामीले चार वर्षको अवधिमा भने जतिकै दिन सकेका छैनौँ । भाषण गर्नु र कार्यायोजना बनाएर अघि बढ्नु फरक कुरा हो । हामीसँग स्थानीय सरकार सञ्चालन कार्यविधि थिएन, कर्मचारी थिएनन् । केही काम अघि बढाउन सकेनौँ । कोरोनाले केही समय अवरोध खडा गर्‍यो । तर, काम नभएका होइनन् । जनताका न्यूनतम आवश्यकतालाई पूरा गरेका छौँ । नेपालको संविधानतः गरिएको व्यवस्था अनुसार हामीले काम अघि बढाएका छौँ । नागरिकको जीवनस्तर उकास्ने कार्यक्रम हामीले अघि बढायौँ ।