दाङ– दाङको पहाडी भेगमा जडीबुटीका बिरुवा रोपेका किसानलाई मंगलबारदेखि प्रोत्साहनबापतको रकम वितरण सुरु गरिएको छ ।

डिभिजन वन कार्यालय दाङको सहयोग र सर्वोत्तम बहुउद्देश्यीय सहकारी संस्था दाङको आयोजनामा घोराही र बंगलाचुलीका करिब ६ सय बढी किसानलाई प्रोत्साहन रकम वितरण गर्न सुरु गरिएको हो ।

सहकारीमार्फत पकेट क्षेत्रमा जडीबुटी विस्तार कार्यक्रमअन्तर्गत बंगलाचुली र घोराहीका गरी ७ वटा वडामा ७० हजार बढी बिरुवा रोपिएको छ ।

घोराही उप–महानगरपालिकाको वडा नम्बर १८ र १९ तथा बंगलाचुली गाउँपालिकाका १ देखि ५ वटा वडामा टिमुर, मालागेडी र दालचिनीका बिरुवा रोपिएको
छ ।

सर्वोत्तम बहुउद्देश्यीय सहकारी संस्थामार्फत किसानलाई गाउँमै निःशुल्क बिरुवा उपलब्ध गराइएकामा प्रतिबिरुवा ३ रुपैयाँको दरले यो वर्ष प्रोत्साहनबापत २ लाख १० हजार रुपैयाँ दिइने संस्थाका अध्यक्ष ध्रुवराज पौडेलले बताए ।

प्रोत्साहन रकम वितरण कार्यक्रमअन्तर्गत घोराही उप–महानगरपालिका वडा नम्बर १९ का च्यानगैरा, राम्चे, तिर्साङ, लाकुरीडाँडा, पटिन्जा र बंगलाचुली गाउँपालिकाको वडा नम्बर २ का मर्पेस र खाडागाउँमै पुगेर प्रोत्साहनबापतको रकम वितरण गरिएको कार्यक्रमका सुपरभाइजर बालचन्द्र शर्माले जानकारी दिए ।

बिरुवा लगाउने किसानलाई सबै वडाका गाउँमै पुगेर १५ साउनसम्म प्रोत्साहन रकम वितरण गर्ने कार्यक्रम रहेको सुपरभाइजर शर्माको भनाइ छ ।

जडीबुटीमार्फत स्थानीय किसानको आयआर्जनमा सहयोग गर्ने उद्देश्यले डिभिजन वन कार्यालय दाङले निःशुल्क बिरुवा, प्रोत्साहनबापतको रकम र फिल्डमा प्राविधिक सहयोगसमेत गर्दै आएको छ ।

कार्यक्रमलाई थप प्रभावकारी बनाउँदै आगामी वर्षमा समेत निरन्तरता दिई सम्भावित क्षेत्रमा उद्योग स्थापना गर्नेसम्मको योजना रहेको डिभिजन वन कार्यालय दाङका प्रमुख विजयराज सुवेदीले बताए ।