साउन १४, २०७८
चितवन- चितवनको भरतपुर महानगरपालिकाले किसानलाई मिल्किङ मेसिन र चापाकटर वितरण गरेको छ । महानगरभित्रका किसानलाई अनुदानमा मिल्किङ मेसिन र चापाकटर हस्तान्तरण गरिएको हो । १७ वटा व्यावसायिक फार्मलाई मिल्किङ मेसिन तथा २१ वटा फार्मलाई चापाकटर वितरण गरिएको हो ।
कार्यक्रममा महानगर प्रमुख रेनु दाहालले कृषि यान्त्रिकीकरणमा महानगरले जोड दिएको बताइन् । महानगरले आवश्यकताअनुसार किसानलाई कृषि उपकरण अनुदानमा उपलब्ध गराउँदै आएको बताइन् ।
लागत न्यून गरेर उत्पादन बढाउने कार्यमा महानगरले जोड दिँदै आएको उनको भनाइ थियो । महानगरले बजेटमा कृषिलाई विशेष जोड दिएको उनले जानकारी गराइन् । यस्ता कार्यक्रमलाई प्रभावकारिताअनुसार निरन्तरता दिँदै जाने उनको भनाइ थियो
महानगर उपप्रमुख पार्वती शाह ठकुरीले दुग्ध व्यवसायलाई थप व्यवसायिकीकरणका गर्न महानगरले अनुदानका बिभिन्न कार्यक्रम अघि बढाएको बताइन् ।
भरतपुरले कृषिमा ठूलो सम्भावना बोकेकाले महानगरले पनि बजेटमा महत्त्वका साथ कृषिलाई जोड दिएको जानकारी दिइन् । किसानले अनुदान प्राप्त उपकरणको सदुपयोग गर्ने विश्वास उनले व्यक्त गरिन् ।
मिल्किङ मेसिनले एकै पटकमा ३ देखि ५ मिनेटमा गाई दुहुन सक्ने भएकाले श्रम र समय दुवैको बचत हुनेछ । चापाकटरबाट घाँस काटेर पशुलाई खुवाउन तथा थोरै आहारबाट पनि पशुपालन गर्ने सक्ने भएकाले निकै उपयोगी हुनेछ ।
महानगरका पशु विकास अधिकृत मेघराज ढकालका अनुसार चापाकटरको बजार मूल्य प्रतिमेसिन ३० हजार रुपैयाँ छ । गत वर्ष नै अनुदानका लागि आवेदन परेका १० तथा यो वर्षका १० जना किसानलाई चापाकटर वितरण गरिएको हो ।
गत वर्ष आवेदन परेका १० जना किसानलाई शतप्रतिशत अनुदान तथा यस वर्षकालाई ५० प्रतिशत अनुदानमा चापाकटर वितरण गरिएको उनले बताए ।
यस्तै, गत वर्ष नै आवेदन परेका १७ जना किसानलाई ७५ प्रतिशत अनुदानमा मिल्किङ मेसिन वितरण गरिएको हो । मिल्किङ मेसिनको बजार मूल्य १ लाख ७५ रुपैयाँ छ ।
फागुन २८, २०८०
फागुन २७, २०८०
फागुन २१, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
