तनहुँ–सडक सञ्जालबाट सम्पर्क विच्छेद हुने जरेवरका बासिन्दालाई यो बर्खामा पक्की मोटरेबल पुलबाट खोला तर्न पाउने आश थियो । भीमाद नगरपालिका वडा नम्बर ८ थामडाँडा र शुक्लागण्डकी नगरपालिका वडा नम्बर ११ जरेबर जोड्ने गरी वर खोलामा शिलान्यास गरेको पुल गत २२ असारमा सक्नुपर्ने सम्झौता हो ।

 

मुक्तिनाथ दीपज्योति ज्वाइन्ट भेञ्चर पोखराले ठेक्का लिएको यो पुलको ४ वटा पिल्लर ठडिनेबाहेक काम भएको छैन । यतिबेला खोलामा उर्लेको भेलले कामसमेत रोकिएको छ । 

 

हिउँदमा कुलो भएर बग्ने बुडुवा खोला यतिबेला तर्न नसक्ने अवस्थामा छ । यहाँका स्थानीय घाँसदाउरा र मेलामात गर्न बन्दै गरेको अधुरो पुलबाट जोखिम मोलेर तर्न बाध्य छन् । बुडुवा खोला तरेर लोकतान्त्रिक मोटरमार्गमा सवारी गुडाउने चालकलाई पनि दुःख छ ।

 

वर्षौंदेखि मोटरेबल पुल चाहियो भन्दै आएका स्थानीयको मागलाई सुनुवाइ गर्दै गण्डकी प्रदेश सरकारको लगानीमा गत पुसमा बुडुवा खोलामा पुल शिलान्यास गरियो । गणेश कुण्ड आइएस निर्माण सेवा नुवाकोटले ठेक्का लिएको पुलको सम्पन्न गर्ने म्याद गत २७ असारमा सकिएको छ ।

 

पुलको काम सक्न १५ प्रतिशत बढी रहेको निर्माण उपभोक्ता समितिका अध्यक्ष पदमराज सेन ठकुरीले बताए । ‘यतिबेला पुल बनाएर सकिन्थ्यो होला । बाढी आएर काम रोकियो’, उनले भने । पुल र सडकको बिचमा फिल्डिङ गर्ने काम बाँकी रहेको उनी बताउँछन् । 

 

ऋषिङ गाउँपालिका वडा नम्बर ४ मधुवन र ५ रुपटार जोड्ने गरी ज्वाला खोलामा निर्माण थालिएको मोटरेबल पुलको पनि सम्पन्न गर्नुपर्ने मिति कटेको छ । ठेक्का सम्झौताअनुसार गत २५ असारमा यो पुल ठडिएर मोटर गुड्न थाल्नुपर्ने हो ।

 

तर, पनि पुल तत्कालै सम्पन्न हुने छनक देखिन्न । ज्वाला खोलासहित शालिकराम करिडोरमा मात्र ४ वटा पुल शिलान्यास गरिएको थियो । हालसम्म एउटा पनि सम्पन्न भएको छैन ।

 

रिस्ती खोलामा मात्रै दुई पुल शिलान्यास भए । दुवै पुल निर्माणाधीन अवस्थामा छन् । तनहुँमा यीलगायत गत आर्थिक वर्ष २०७७/७८ मा गण्डकी प्रदेश सरकारको लगानीमा मोटरेबल पुल शिलान्यासको लहर चलेको थियो ।

 

जिल्लाका १२ नदी, खोलामा मोटरेबल पुल बनाउन थालिएको हो ।  तर, एउटा पनि सम्पन्न नभएको पूर्वाधार विकास कार्यालय तनहुँले जनाएको छ । ६ वटा पुल असारमा सकिनुपर्ने थियो ।

 

३ वटा अबको असोजसम्म सम्पन्न गर्ने म्याद छ । बाँकी पुलको म्याद आगामी आर्थिक वर्षसम्म छ । कोरोनाका कारण पुल निर्माणमा ढिलाइ भएको पूर्वाधार विकास कार्यालय तनहुँका प्रमुख ओमराज ढुंगाना बताउँछन् । उनी भन्छन्, ‘कोरोना कहरमा निर्माण कम्पनीले काम गर्न खोजेका हुन् । लक्ष्यअनुसार सकेनन् ।’ 

 

निर्माणाधीन सबै पुलको कार्यप्रगति सन्तोषजनक देखिएको उनले बताए । कोरोना कहरमा म्याद सकिएका निर्माणाधीन योजनालाई सरकारको निर्णयअनुसार ६ महिना फेरि म्याद थपिने उनले जानकारी दिए । म्याद सकिएका पुल ६ महिनाभित्र सम्पन्न हुने गरी काम गर्न निर्देशन दिने उनको भनाइ छ ।

 

गत वर्ष शिलान्यास भएका २ वटा पुलको काम भने अन्तिम चरणमा पुगेको छ । रिस्ती खोला सोती पसल र बुडुवा खोला लोकतान्त्रिक पुलको काम अन्तिम चरणमा पुगेको ढुंगानाले जानकारी दिए । ‘दुवै पुलको ९० प्रतिशत काम भएको छ । अब स्ल्याब राख्ने काम मात्र बाँकी हो’, उनले भने ।

 

१२ पुललाई २९ करोड १ लाख २९ हजार रुपैयाँ भुक्तानी भइसकेको छ । यो आर्थिक वर्ष प्रदेश सरकारले ती पुललाई २६ करोड ४० लाख रुपैयाँ विनियोजन गरेको छ । सबै पुल सम्पन्न गर्न ८९ करोड ६६ लाख ६१ हजार २ सय ४० रुपैयाँमा सम्झौता भएको हो । 

 

चालू वर्षमा पनि गण्डकी प्रदेश सरकाले तनहुँका १४ मोटरेबल पुल निर्माणका लागि बजेट विनियोजन गरेको छ । १४ पुललाई ३ करोड ३० लाख रुपैयाँ बजेट विनियोजन भएको पूर्वाधार विकास कार्यालय तनहुँले जानकारी दिएको छ ।

 

बजेट विनियोजन भए पनि पुलको उपयोगिता अध्ययन गरी माटो परिक्षण भएपछि डिपिआर तयार भई स्रोत सुनिश्चितता हुदाँ बल्ल पुल निर्माणको काम थालनी हुने जनाइएको छ ।