काठमाडौं– निर्वाचन आयोगले नेकपा एमालेबाट अलग भएका नेताहरुले गठन गरेको पार्टी नेकपा एकीकृत समाजवादी पार्टीलाई दर्ता प्रमाणपत्र दिएको छ । बुधबार राती आयोगले सो दललाई आयोगको अभिलेखमा १६६ नम्बरमा दर्ता गरेको हो ।
सरकारले संघीय संसद वा केन्द्रीय समितिको २० प्रतिशत पुर्याएर दल विभाजन गर्न पाउने गरी राजनीतिक दलसम्बन्धी अध्यादेश ल्याएपछि एमालेका ५८ केन्द्रीय सदस्यले नयाँ दल दर्ताका लागि निवेदन दिएका थिए ।
नवगठित नेकपा एकीकृत समाजवादी पार्टीका नेता राजेन्द्र पाण्डेले नेकपा एमालेमा सक्रिय १९१ जना केन्द्रीय सदस्यमध्ये ५६ र ३० जना सासंदले आयोगमा पुगेर सनाखत गरेपछि पार्टीले बैधानिकता पाएको बताए ।
पार्टीले वैधानिकता पाएसँगै आफूहरूको जितको सुरुवात भएको बताउँदै नेता पाण्डेले नयाँ समाजवादी कार्यक्रम लिएर जनतामा जाने प्रतिबद्धता व्यक्त गरे । पार्टीलाई सरकारदेखि जनतासम्म जाने वैधानिकता मिलेको बताउँदै पाण्डेले प्रगतिशील पार्टी निर्माणमा खटिने बताए ।
अब प्रदेश र स्थानीय तहका जनप्रतिनिधिहरुलाई दल रोज्न २१ दिनको समय दिइनेछ ।
२३ फागुन २०७७ को सर्वोच्च अदालतको फैसलापछि पुनर्स्थापित एमालेमा माधवकुमार नेपाल समूहले लगातार समानान्तर गतिविधि गर्दै आएको थियो । यो समूहमा रहेका १० स्थायी कमिटीसहित केन्द्रीय कमिटी र संघीय संसदको एउटा पक्ष भने नेकपा एमालेमै रहने भएको छ ।