भदौ ११, २०७८
काभ्रेपलाञ्चोक– पनौती नगरपालिकाले कोरोना संक्रमणबाट मृत्यु भएकाको परिवारलाई आर्थिक सहयोग दिने भएको छ ।
नगरपालिकाका ११ महिलासहित २२ जनाको कोरोना भाइरस संक्रमणबाट मृत्यु भएको नगरपालिका स्वास्थ्य शाखाले जनाएको छ । हालै सम्पन्न नवौँ नगरसभाले कोरोना भाइरस संक्रमणबाट मृत्यु भएकाको परिवारलाई २५ हजारका रुपैयाँका दरले आर्थिक सहयोग गर्ने निर्णय गरेको थियो । यसका लागि नगरपालिकाले मृतकको कागजातसहित स्वास्थ्य शाखामा सम्पर्क गर्न सम्बन्धित परिवारलाई आग्रह गरेको छ । ‘नगरसभामा निर्णय भएअनुसार कोरोना भाइरस संक्रमणबाट मृत्यु भएकाको परिवारलाई २५ हजारका दरले आर्थिक सहयोग गर्दैछौँ’, नगरप्रमुख भीम न्यौपानेले भने ।
उनका अनुसार आजदेखि सम्पर्कमा आएका मृतकको परिवारलाई उक्त सहयोग रकम हस्तान्तरण गरिनेछ । हाल नगरपालिका भित्रका १२ महिलासहित ४६ जना कोरोनाका सक्रिय संक्रमित छन् । पनौती नगरपालिकाका सबै संक्रमित होम आइसोलेसनमै रहेको जिल्लास्थित कोभिड–१९ संक्रमण नियन्त्रण, रोकथाम र उपचारसम्बन्धी केन्द्र (डिसिसिएमसी) ले जनाएको छ ।
नगरपालिकाले आउँदो केही महिनामा कोरोना भाइरस संक्रमणको दर बालबालिकामा उच्च हुने प्रक्षेपण गरेको छ । सोही अनुरुप संक्रमित बालबालिका लागि हाललाई ३० श्ययाको अक्सिजनसहितको आइसोलेसन वार्ड निर्माण गरेको छ । स्थानीय रोटरी नेपालसँगको सहकार्यमा सम्भावित दुर्घटनाबाट बालबालिकालाई जोगाउन अहिल्यै पूर्वतयारीस्वरुप वडा ४ कार्यालयमा आइसोलेसन वार्ड बनाएको नगरप्रमुख न्यौपानेले बताए ।
नगरपालिकाले कोरोना भाइरस संक्रमणको दोस्रो लहर सुरु भएपछि वैशाख अन्तिम साता २५ श्ययाको अक्सिजनसहितको आइसोलेसन कक्ष व्यवस्थित गरेको थियो । काभ्रेपलाञ्चोकमा हालसम्म १४ हजार ६३ जनामा कोरोना भाइरस संक्रमण देखिएको थियो । तीमध्ये १ सय ८७ जनाको मृत्यु भएको छ । हालसम्म कूल संक्रमितमध्ये ९६ प्रतिशत अर्थात् १३ हजार ४३२ जना संक्रमणमुक्त भइसकेको केन्द्रले जनाएको छ । केन्द्रका अनुसार पछिल्लो २४ घण्टामा ४३ जना कोरोना संक्रमित थपिएका छन् भने ८५ जना संक्रमणमुक्त भएका छन् ।
काभ्रेपलाञ्चोकमा हाल ४ सय ४४ जना सक्रिय संक्रमित छन् । तीमध्ये सबैभन्दा बढी धुलिखेल नगरपालिकामा १ सय २६, बनेपामा १ सय ०४, पाँचखालमा ५१, नमोबुद्धमा ५४, मण्डनदेउपुरमा नौ तथा रोशी गाउँपालिकामा १०, चौँरी देउरालीमा एक, तेमालमा एक, भुम्लु १५, खानीखोलामा दुई, बेथानचोकमा १८ र महाभारत गाउँपालिकामा दुई जना रहेको केन्द्रले जनाएको छ ।
चैत १२, २०८०
फागुन २९, २०८०
फागुन २८, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
