रूपन्देही–लुम्बिनी प्रदेशका मुख्यमन्त्री कुलप्रसाद केसीले आर्थिक अभावका कारण समयमा उपचार नपाएर मृत्यु भएका युद्ध पत्रकार बिन्दुकुमार चौहानका छोराछोरीको व्यवस्थापन गर्ने भएका छन् । 

शनिबार चौहान परिवारलाई समवेदना दिन लुम्बिनी सांस्कृतिक नगरपालिका वडा नम्बर ११ मोगलहा चोक पुगेका केसीले दयनीय आर्थिक अवस्था देखेपछि उनका छोराछोरीको जिम्मा लिने बताएका हुन् । चार छोरा, तीन छोरी र श्रीमतीका अभिभावक चौहानको २९ भदौमा उपचारको क्रममा निधन भएपछि उनको परिवार विचल्लीमा परेको थियो ।

२०५५ बाट पत्रकारिता गरेका चौहानले नेपालका विभिन्न मिडियामा निरन्तर लेख्दै आएका थिए । माओवादीको सशस्त्र विद्रोहमा सुरक्षाकर्मीबाट समेत यातना झेलेका चौहानको मृत्यु आर्थिक अभावको कारण भएको थियो ।  चौहानलाई निमोनियाका कारण स्वास्थ्यमा जटिल समस्या आएपछि तौलिहवा अस्पताल हुँदै प्रादेशिक अस्पताल बुटवल पुर्‍याइएको थियो ।

प्रादेशिक अस्पताल बुटवलमा उनको स्वास्थ्य अवस्था गम्भीर भएको थाहा पाएपछि नेपाल पत्रकार महासंघ रूपन्देही शाखा, लुम्बिनी प्रेस क्लब र प्रेस संगठन नेपालको पहलमा सुविधासम्पन्न अस्पताल युनिभर्सल मेडिकल कलेज शिक्षण अस्पताल रानीगाउँ भैरहवामा उपचारका लागि लगिएको थियो ।  तर, उनको स्वास्थ्य अवस्था निकै जटिल भएका कारण अस्पताल भर्नाको दुई दिनपछि २९ भदौमा मृत्यु भएको थियो ।

जीवनभर निःस्वार्थ निःशुल्क सेवामा लागिरहने चौहानले व्यक्तिगत रूपमा भने आर्थिक उन्नति गर्न सकेका थिएनन् । ४९ वर्षीय चौहानको निधनसँगै उनको परिवारले आर्थिक झमेला बेहोरिरहेको छ । घरमा एक अपांगता र अशक्त छोरीसमेत रहेका चौहानका छोराछोरीको व्यवस्थापन मुख्यमन्त्रीले गर्ने आश्वासन दिएपछि स्थानीयले खुसी व्यक्त गरेका छन् ।