धनुषा– जनकपुरमा शव दाह गर्न इलेक्ट्रिक मेसिन खरिद गर्ने जनकपुरधाम उपमहानगरपालिकाको बोर्ड बैठकले निर्णय गरेको छ ।
आइतबार बसेको बोर्डको बैठकले सर्वसम्मतिबाट दाहसंस्कार गर्न मेसिन खरिद गर्ने निर्णय भएको बोर्ड सदस्य वडा– ७ का अध्यक्ष जानकीराम साहले जानकारी दिए ।
दाह संस्कारका लागि मेसिन कहिले खरिद गर्ने भन्नेबारे बैठकले स्पष्ट नपारे पनि ठाउँको पहिचान गरेर यथाशीघ्र खरिद प्रक्रियामा जाने निर्णय गरेको कार्यकारी प्रमुखसमेतको अख्तियारी पाएकी उपप्रमुख रीता मिश्रले बताइन् ।
झन्डै चार महिनापछि बसेको पालिकाको बोर्ड बैठकमा विजयादशमीमा बिजुली बत्ती लगाउने, दलित छात्रावास, क्वारेन्टाइनमा खटेको भत्ता र तलब सम्बन्धमा, पालिकाभित्र विभिन्न वडाका लागि योजना सम्बन्धमा, ल्याण्डफिल साइटलगायत विषयमा बैठकमा छलफल भएको बोर्ड सदस्य वडा– ९ का अध्यक्ष परमेश्वर साहले बताए ।