राजविराज- सप्तरीको रूपनी गाउँपालिकाका तीन कर्मचारीसहित ११ जनामा कोरोना संक्रमण पुष्टि भएपछि कार्यालयबाट प्रवाह हुने सबै सेवा एक साताका लागि बन्द गरिएको छ ।

पछिल्लो पटक कार्यालयका तीन कर्मचारीमा कोरोना पोजिटिभ पुष्टि भएसँगै आइतबारदेखि लागू हुने गरी कार्यालयका सबै काम बन्द गरिएको हो ।

गाउँपालिका अध्यक्ष हरेराम यादवका अनुसार कार्यालय सहयोगी दुई र अपरेटर सहायक एक जनामा आइतबार कोरोना संक्रमण पुष्टि भएको छ ।

‘कार्यालयका अन्य कर्मचारी, जनप्रतिनिधिका साथै उनीहरूसँग जोडिएका व्यक्तिमा सम्भावित संक्रमणको जोखिम रहेकाले परीक्षण गराउनुपर्ने हुँदा गाउँपालिकाबाट नागरिकलाई दिइने सबै बन्द गरेका हौँ’, अध्यक्ष यादवले भने । कार्यालय बन्द रहे पनि अतिआवश्यक काम भने प्रभावित नहुने उनले बताए ।

यसअघि वडा- ४ का वडा अध्यक्षमा संक्रमण देखिएको थियो । वडा अध्यक्षकी छोरी, वडा- १ सदस्य, गाउँपालिकाका आईटी इन्जिनियरकी भाउजू, तीन दिनअघि मृत्यु भएका तेह्रथुममा कार्यरत गाउँपालिका वडा- १ का सबइन्जिनियरकी श्रीमतीमा कोरोना संक्रमण पुष्टि भएको छ ।