असोज २८, २०७८
बाजुरा– बाजुराको स्वामीकार्तिक खापर गाउँपालिका वडा नम्बर १ मा रहेको झुगलापाटा भीर फुटेपछि कर्णाली नदी थुनिएको छ । जगन्नाथ गाउँपालिकाको कार्यालय जुड्डीपारिपट्टिको भीर फुटेर सुक्खा पहिरो जाँदा कर्णाली नदी थुनिएको हो ।
करिब दुई महिना पहिलेदेखि बेलाबेला भीरबाट पहिरो जान थालेपछि नदी थुनिने खतरा बढेको स्थानीयले बताए । दुई महिनायताको लगातार सुक्खा पहिरोले कर्णाली थुनिन थालेपछि नदी आसपास तथा छेउछाउ बसोबास गर्ने स्थानीय त्रसित छन् ।
झुगलापाटा भीर फुट्दा स्वामीकार्तिक खापर गाउँपालिका वडा नम्बर १ रुडी गाउँ, जगन्नाथ गाउँपालिकाको कार्यालय, जुड्डी प्रहरी चौकीलगायत आसपास क्षेत्र उच्च जोखिममा परेको बताइएको छ ।
बेलाबेला बग्ने पहिरोबाट कर्णाली थुनिन थालेसँगै नदी आसपास क्षेत्रमा बसोबास गरिरहेका स्थानीयलाई डरत्रासमा बस्नुपर्ने बाध्यता आइलागेको छ । कर्णाली प्रदेशको हुम्ला, मुगुसँगै बाजुरा हुँदै बग्ने कर्णालीमा सुक्खा पहिरो खस्दा नदीको पानी थुनिएपछि वरपरका बस्ती जोखिममा परेका हुन् ।
स्वामीकार्तिक वडा नम्बर १ रुडीगाउँको तल र छुद्यदरी गाउँ नजिकै सुक्खा पहिरो खस्दा कर्णालीको केही भाग थुनिएको जिल्ला प्रहरी कार्यालय बाजुराले जनाएको छ । एक्कासि पहिरो खस्दा दुई दिनअघि १५ मिनेटसम्म कर्णाली थुनिएपछि नदी वरपरका स्थानीय त्रसित भएका थिए ।
त्यसपछि नदीको एकतर्फीबाट पानी बग्न सुरु भएको स्थानीयले बताए । स्वामीकार्तिक रुडी गाउँको आसपासबाट निरन्तर पहिरो जान थालेपछि रुडी गाउँका करिब १ सय ५० बढी घरपरिवार उच्च जोखिममा रहेका स्थानीय नन्दबहादुर खत्रीले जानकारी दिए छ ।
बस्ती माथि र तलबाट कडा चट्टान फुट्न थालेपछि गाउँ नै जोखिममा रहेको उनले बताए । योसँगै जगन्नाथ गाउँपालिका र जुड्डी प्रहरी चौकी पनि जोखिममा परेपछि कार्यालयका सामान अन्यन्त्र सार्न थालिएको जुड्डी प्रहरी चौकीले जनाएको छ ।
जगन्नाथ गाउँपालिकाको केन्द्र जुड्डी पारिपट्टि स्वामीकार्तिकको छुद्धरी गाउँ नजिकैको भीर फुटेर कर्णाली नदीमा ढुंगा, माटो थुप्रिएपछि नदी थुनिएको स्थानीय शिक्षक दानबहादुर धामीले बताए । यसअघि गत साउनमा पनि पहिरो जाँदा कर्णाली नदी थुनिएको उनको भनाइ छ ।
चैत ०६, २०८०
फागुन ३०, २०८०
फागुन २९, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
