कसले पुर्ने काठमाडौंका सडकमा परेका खाल्डाखुल्डी ?

गुरुप्रसाद अधिकारी

आयोजना प्रमुख, उपत्यका सडक विस्तार आयोजना

संघीय सरकारले सञ्चालन गरेका पूर्वाधार विकासका आयोजनामा स्थानीय सरकारले चासो देखाएनन् । सामान्य खाल्डाखुल्डी पुर्न पनि केन्द्र सरकारको मुख ताक्ने पवृत्ति स्थानीय सरकारमा देखियो ।
 
केन्द्र सरकारको लगानी भएको सडकमा स्थानीय सरकारले समन्वय बाहेक कुनै पनि काम गरेका छैनन् । वर्षादको समयमा सडकमा  पर्ने खाल्डा पुर्ने काम होस् या सडक आसपासमा ढलको पाइप विच्छाउने काममा  स्थानीय सरकारले चासो नै देखाउँदैनन् ।

स्थानीय सरकारले आफ्नो क्षेत्रका भित्री सडकहरुको काम गरेको होला  । तर हालसम्म विस्तार गर्न थालिएका सडकमा स्थानीय सरकारले कुनै काम गरेनन् । उपत्यकाका काँठक्षेत्रमा विस्तार गर्न लागिएको  अधिकांश सडक जारी नै छ । विभिन्न समस्याका  कारण काम हुन सकेका छैनन् । ती सडकमा स्थानीय सरकारले आफ्नो क्षेत्राधिकार नपर्ने भन्दै काम गर्नै मान्दैनन् । जवकी यसमा उनीहरुको अपनत्व हुनुपर्ने हो ।

 
कालोपत्रे भएका सडकमा सामान्य खाल्डा पुर्न पनि केन्द्र सरकारले नै पुग्नुपर्ने अवस्था छ । खाल्डा पुर्न उपत्यकाका काँठ क्षेत्रका सडकमा यस्तो समस्या व्याप्त छ । चाबहिल–साँखु, जोरपाटी–सुन्दरीजल,गोदावरी लगायतका सडकमा सवैभन्दा वढी यस्तो समस्या छ ।

कालोपत्रे भएका सडकमा त समस्या भएन । तर कालोपत्रे नभएका सडकमा खाल्डाखुल्डी, हिलो र धुलोको सास्ती छ । विजुलीका पोल सार्ने, सामान्य खाल्डाखुल्डी पुर्ने, ढलको सामान्य ब्यवस्थापन समेत स्थानीय सरकारले गरेको छैन ।

यी काम सडक विस्तार आयोजना अर्थात केन्द्र सरकारले नै गरेको छ । स्थानीयसँग हामी समन्वय गरिरहेका छौं । तर जनप्रतिनिधिले चासो नै देखाउदैनन् । सवैठाउँमा केन्द्रको आँखा पुग्दैन । यस्तो वेला स्थानीय सरकार नै अग्रसर हुनुपर्ने हो ।

तर आजसम्म यस्तो नहुँदा उपत्यकाका सडकका खाल्डाबाट सर्वसाधारणले सास्ती व्यहोरेका छन् । हामी आग्रह गर्दछौ कि स्थानीय सरकार आफ्ना क्षेत्रका यस्ता मसिना काममा आफै अग्रसर होस । केन्द्रको मुख ताक्ने काम बन्द गरोस ।

कृष्णहरि थापा

नगर प्रमुख, कागेश्वरी मनोहरा नगरपालिका

संघीय सरकारले चलाएका आयोजनामा सबैभन्दा वढी समस्या छ । सिन्धुपाल्चोक जोड्ने चावहिल साँखु सडक वर्षाैदेखि बन्न सकेको छैन । मुआब्जा विवादको विषयले बन्न नसकेको हो ।

स्थानीय सरकारलाई स्थानीयले मुद्धा हालेका छन् हामी मुद्धा खेपिरहेका छौं । त्यसकारण कागेश्वरीको मुख्य सडक बनाउन सकिएको छैन । यो सडक पूर्वप्रधानमन्त्री माधव कुमार नेपालको निर्वाचन क्षेत्र हो । यो सडक निर्माण गर्न भनेर माधवकुमार नेपाल सडक विभाग, सडक विस्तार आयोजना, भौतिक मन्त्रालयसँग पटकपटक छलफल गरेका छाैं ।

मुख्य सडक केन्द्र सरकारले निर्माण गर्ने भएका कारण हामीले गर्न मिल्दैन । मन्त्रिपरिषद्ले निर्णय गरेर हामीलाई दिने हो भने नगरपालिका बनाउन तयार छ ।

उपत्यकाका सडक केन्द्र सरकारले लगाएको ठेक्का हो । यसमा हामीले केहि गर्न सक्दैनौ । यो हाम्रो क्षेत्राधिकार भित्र पर्दैन । तर, केन्द्र सरकारले गर्ने काममा समन्वय, सहजिकरणको काम भने गरेका छौं ।

केन्द्रले भनेजस्तो सडकको खाल्डा पुर्न हामीले आफ्नो क्षेत्राधिकारका सडकमा अरुको मुख ताकेका छैनौ र ताक्दैनौ पनि । कागेश्वरी मनोहराभित्र करिब ८ सय वटा सडक छन् । मुख्य सडक भन्दा बाहेक  अधिकांश सडक कालोपत्रे गरिसकेका छाैं। नगरपालिकाका अन्य शाखा सडक कालोपत्रे गरिसकेका छौं ।

हामे क्षेत्राधिकार भन्दा बाहिरको सडक मर्मत गर्न कि त हामीलाई अधिकार दिनुपर्यो होइन भने स्थानीय सरकारलाई दोश दिएर स.घीय सरकार र यसका आयोजना पन्छिन मिल्दैन । हामीले अधिकार पायौं भने नगरवासीले खाल्डा देख्नै पाउदैनन। म प्रश्न गर्छु– के संघीय सरकार यसका लागि तयार छ ?