तनुहुँ। आँबुखैरेनी गाउँपालिकामा ‘मुख्यमन्त्री नवप्रवर्तन साझेदारी’ कार्यक्रममार्फत सात सय पाँच घरधुरीका बासिन्दा लाभान्वित हुने भएका छन् । उक्त कार्यक्रममार्फत एक हजार सात सय ६५ महिला र एक हजार सात सय ६४ पुरुष गरी तीन हजार पाँच सय २९ व्यक्ति प्रत्यक्ष लाभान्वित हुने भएका छन् । 

त्यसमध्ये चार सय दलित, बाह्मण क्षेत्री छ सय ७७, आदिवासी जनजाति दुई हजार दुई सय ९२ र अन्य एक सय ६० व्यक्ति रहेका छन् । उक्त कार्यक्रममार्फत गाउँपालिकाले उद्योग सञ्चालन गर्न लागेको जनाइएको छ । गाउँपालिकाको ५१ प्रतिशत र अन्यको ४९ प्रतिशत सेयरको व्यवस्था गरिएको प्रमुख प्रशासकीय अधिकृत विष्णुप्रसाद शर्माले जानकारी दिए। 

गाउँपालिका कार्यालयले सञ्चालन गर्न लागेको बाँसजन्य उद्योगका लागि आवश्यक पर्ने उपकरण ल्याइसकेको गाउँपालिका कार्यालयले जनाएको छ । आँबुखैरेनी–२ मार्कीचोकमा बाँस तथा कृषि औजार उत्पादन उद्योगका लागि केही दिनअघि चीनबाट ल्याइएको हो । कम्पनीका रूपमा अघि बढाउन सकेको अवस्थामा उद्योग दिगोरूपमा सञ्चालन गर्न सहयोग पुग्ने उनले बताए। 

उद्योग स्थापनाका लागि कुल लागत रु दुई करोड एक लाख रहेको छ । गण्डकी प्रदेश सरकारले रु एक करोड ४० लाख ७० हजार अनुदान दिएको छ भने गाउँपालिका रु ६० लाख ३० हजार लागत साझेदार रहनेछ । उद्योग सञ्चालनका लागि ल्याइएको उक्त उपकरण अब जडान गरी प्रक्रिया अघि बढाइने गाउँपालिकाले जनाएको छ ।

गरिबी निवारणका लागि गाउँपालिकाले बाँस र कृषि औजारसम्बन्धी उद्योग स्थापना गर्न लागेको गाउँपालिकाका अध्यक्ष शुक्र चुमानले जानकारी दिए। बाँस र फलामबाट विभिन्न सामग्री उत्पादन गर्न प्रदेश सरकारको सहयोगमा उद्योग स्थापना गर्न लागिएको हो । ‘नवीनतम ज्ञान, सीप, सोच र सिर्जनशीलता प्रवर्द्धन गर्न गाउँपालिकाले उद्योग स्थापना गर्न लागेको हो’, उनले भने, ‘उद्योगका लागि दुई भवन निर्माण गरिएको छ ।’

उद्योगबाट बाँसजन्य सामग्री सोफा, कुर्सी, टेबल निर्माण गरिनेछ । गाउँपालिकाभित्र रहेका विपन्न समुदायलाई घरेलु सीप सिकाएर आयआर्जनसँग जोड्ने मुख्य लक्ष्य रहेको अध्यक्ष चुमानले बताउनुभयो । त्यसैगरी सामुदायिक विद्यालयका लागि आवश्यक डेस्क, बेन्चलगायत सिकाइ सामग्री सोही उद्योगबाट स्थापना गरिने भएको छ । 
    
गाउँपलिकाले स्थानीय स्रोत र सीपको प्रवर्द्धन गरी उद्यमशीलता विकास गर्ने नीतिअन्तर्गत सीमान्तकृत र पिछडिएको भुजेल तथा मगर समुदायका ३४ जनालाई बाँसजन्य सामग्री उत्पादनको तालिम दिइसकेको छ । तालिम लिएकाहरूले बाँसजन्य सामग्री उत्पादन सुरु गरिरहेको सो गाउँपालिकाले जनाएको छ ।