धनगढी– गौरीफन्टा नाका हुँदै भारतबाट कैलाली प्रवेश गरेका ११ जनामा कोरोना संक्रमण पुष्टि भएको छ । पछिल्लो १ सातायता गौरीफन्टा नाका भएर कैलाली प्रवेश गरेका ११ जनामा संक्रमण पुष्टि भएको कैलालीका प्रमुख जिल्ला अधिकारी खगेन्द्रप्रसाद रिजालले बताए । संक्रमण बढ्न थालेपछि अहिले सेती प्रादेशिक अस्पतालमा कोरोना परीक्षणको दायरा बढाइएको छ । मंगलबार मात्र ३१ जनाको कोरोना परीक्षण गरिएको थियो ।
‘केही दिन अघिसम्म दैनिक १५ देखि २० जनासम्म परीक्षण भइरहेको थियो । नेपालबाट रोजगारीका लागि भारत गएकाहरू कोरोनाका संक्रमण र लकडाउनका कारण पुनः नेपाल फर्किन थालेका छन् । यसले पुनः सन्त्रास बढाएको छ । त्यसका लागि हामीले पहल गरिरहेका छौँ’, प्रमुख जिल्ला अधिकारी रिजालले भने । गौरीफन्टा नाकामा स्थापना गरिएको कोभिड–१९ परामर्श तथा परीक्षणमा खटिएका गणेश साउदले पछिल्लो केही दिनयता नेपाल फर्किनेको संख्या ह्वात्तै बढेको बताए ।
धनगढी उपमहानगरले भारतबाट आउनेलाई १० दिनसम्म क्वारेन्टाइनमा राखेर घर पठाउने विषयमा छलफल थालेको छ । ‘हामीले १० दिनसम्म क्वारेन्टाइनमा राखेर पठाउने विषयमा छलफल थालेका छौँ,’ स्वास्थ्य शाखाका जनस्वास्थ्य निरीक्षक लक्ष्मीराज उपाध्यायले भने, ‘तर, अहिलेसम्म कार्यान्वयनमा ल्याइएको छैन । अवस्था हेरेर निर्णय गर्छौं ।’
भीडभाड र मेला–महोत्सवमा रोक
भारतबाट फर्किरहेका नेपालीमा संक्रमण देखिन थालेपछि सतर्कता बढाइएको छ । कोरोना महामारी फैलिन सक्ने सम्भावनालाई दृष्टिगत गरी स्थानीय प्रशासनले कैलालीमा भेला हुन, जात्रा, पर्व, भीडभाड गर्न, महोत्सव, जुलुस, मेला सञ्चालनमा रोक लगाएको छ ।
जिल्ला प्रशासन कार्यालय कैलालीले विज्ञप्ति जारी गर्दै जिल्लाभर होलीमा हुने भीडभाडमा रोक लगाएको हो । जिल्ला सुरक्षा समिति र जिल्ला कोभिड– १९ संकट व्यवस्थापन केन्द्रको निर्णयले स्थानीय प्रशासन ऐनअनुसार प्रमुख जिल्ला अधिकारी रिजालले आदेश जारी गरेका हुन् ।
बाहिर निस्किँदा अनिवार्य मास्क प्रयोग गर्न निर्देशन दिइएको छ । भारतसँग सीमा जोडिएकाले त्यहाँबाट आउने नागरिकको एन्टिजोन विधिमार्फत परीक्षण गर्न थालिएको छ । कोरोना महामारीको सम्भावनालाई दृष्टिगत गरी पहिले सञ्चालन आएका क्वारेन्टाइन, आइसोलेसनलाई तयारी अवस्थामा राखी स्वास्थ्य सेवा थप प्रभावकारी बनाउन आवश्यक तयारीसमेत थालिएको छ । आदेशको अवज्ञा गरे कारबाही हुने कैलाली प्रशासनले जनाएको छ ।