ताप्लेजुङ– जिल्ला आयुर्वेद स्वास्थ्य केन्द्र ताप्लेजुङले यहाँका कोरोना संक्रमितलाई घर–घरमै पुगेर आयुर्वेद औषधी वितरण गर्न थालेको छ ।
पछिल्लो समय फुङ्लिङ नगरपालिका वडा नम्बर २ मा रहेका १५ जना संक्रमितलाई घर–घरमै पुगेर आयुर्वेद औषधी वितरण गरिएको जिल्ला आयुर्वेद स्वास्थ्य केन्द्र ताप्लेजुङका कविराज निरीक्षक टेकनाथ अर्यालले जानकारी दिए ।
सो क्रममा आयुर्वेद स्वास्थ्य केन्द्रको टोलीले योगको फाइदा तथा आहारविहार र पोषणयुक्त खानाबारे जानकारी गराएको अर्यालले बताए । केन्द्रको टोलीले यष्ठीमधु चूर्ण, अश्वागन्धा चूर्ण, गुडुची चूर्ण र शितोपलादी चूर्णसहितका आयुर्वेद औषधी वितरण गरेको छ ।
कोरोना संक्रमितका लागि पछिल्लो समय आयुर्वेद औषधी लाभप्रद हुने बताइँदै आएको छ । स्वास्थ्य केन्द्रको टोलीले जिल्लाका विभिन्न स्थानीय तहमा रहेका संक्रमित तथा जिल्ला अस्पतालको कोभिड अस्पतालमा रहेका संक्रमितलाई समेत आयुर्वेद औषधी वितरण गरेको छ ।
संक्रमितलाई घरमै पुगेर आयुर्वेद औषधी वितरण र आइसोलेसनमा बस्दा अपनाउनुपर्ने सावधानीका उपायबारे जानकारी प्रेषण गर्ने गरिएको जिल्ला आयुर्वेद स्वास्थ्य केन्द्र ताप्लेजुङले जनाएको छ ।