दार्चुला– कृषि क्षेत्रको प्रवद्र्धनका लागि दार्चुलाको अपि हिमाल गाउँपालिकाले हरेक वडामा कृषि व्यवसाय स्रोत केन्द्र बनाउने अभियान थालेको छ । गाउँपालिकाले आलु, मकै, गहुँ, धान, कोदो, फापर, फलफूल तथा तरकारी, पशुपक्षीपालनलगायत फरक–फरक कृषि व्यवसायको स्रोत केन्द्र बनाउने अभियान थालेको हो ।

गाउँपालिकाले कृषि व्यवसाय स्रोत केन्द्र बनाउन चालू आर्थिक वर्षमा कुल ७४ लाख रुपैयाँ बजेट खर्च गर्दै छ । कृषि क्षेत्रको कार्यक्रम सञ्चालनका लागि हरेक वडामा ५ लाख रुपैयाँ बजेट विनियोजन गरिएको अपि हिमाल गाउँपालिकाका कृषि शाखा सहायक रोहित धामीले बताए । उनले भने, ‘हरेक कृषक समूहलाई आवश्यक सीप तथा तालिमका साथै बिउबिजन, उन्नत जातका पशुपक्षी, औजार, विषादी र आर्थिक तथा प्राविधिक सहयोग गाउँपालिकाले उपलब्ध गराउनेछ ।’

कृषि व्यवसाय केन्द्र बनाउने उद्देश्यले गाउँपालिकाको वडा नम्बर १ मा राजमा खेती विस्तारका लागि ३ लाख, वडा नम्बर २ मा पोलिहाउस खरिदका लागि २२ लाख तथा राजमा पकेटल क्षेत्र निर्माणका लागि ६ लाख रुपैयाँ बजेट विनियोजन गरेको छ । यस्तै, गाउँपालिकाको वडा नम्बर ३ मा स्याउ खेती विस्तारका लागि १२ लाख, राजमा पकेट क्षेत्रका लागि ६ लाख रुपैयाँ बजेट विनियोजन गरिएको छ । वडा नम्बर ४ मा पोलिहाउस निर्माणका लागि २२ लाख तथा बिउबिजन खरिदका लागि १० लाख, ओखर खेती विस्तारका लागि ६ लाख रुपैयाँ बजेट विनियोजन गरिएको अपिहिमाल गाउँपालिका कृषि शाखाले जनाएको छ ।

अपिहिमालको वडा नम्बर ५ मा ओखर पकेट क्षेत्र निर्माण तथा कृषि उपज संकलन केन्द्रका लागि ५ लाख रुपैयाँ विनियोजन गरिएको छ । सबै वडामा १÷१ वटा कृषि व्यवसायको स्रोत केन्द्र बनाउने उद्देश्यसहित हरेक वर्ष क्रमशः बजेट बढाउँदै लगिएको गाउँपालिकाले जनाएको छ ।

कृषक समूहबाहेक हरेक घरलाई तरकारी खेतीमा आत्मनिर्भर बनाउन यस वर्ष प्लास्टिक वितरण गरिनेछ । कृषि क्षेत्रमा लगानी बढाएपछि युवा कृषकसमेत आकर्षित गर्न सकिने गाउँपालिकाको विश्वास छ ।

पालिकाको समृद्धि र विकासका लागि कृषि क्षेत्रलाई विशेष प्राथमिकतामा राखिएको गाउँपालिका अध्यक्ष धर्मानन्द मन्याल बताउँछन् । यसका लागि गाउँपालिकाका अध्यक्ष र वडामा वडाध्यक्षको संयोजकत्वमा कृषि विकास समिति गठन गरिएको छ । ‘अपिहिमाल उच्च भूभाग समेटिएर बनेका कारण पनि यस क्षेत्रमा तरकारी तथा दलहन बालीको निकै सम्भावना छ’, उनले भने ।

उत्पादित कृषिउपज खपतका लागि पनि गाउँपालिकाले सहयोग गर्ने योजना बनाएको छ । गाउँपालिकामा कृषि क्षेत्रको विकासका लागि वडा तथा पालिकास्तरीय आवधिक योजनाको निर्माणसमेत भइरहेको जनाएको छ । आवधिक योजनाको निर्माणका लागि अपि हिमाल गाउँपालिकामा ग्रामीण जलस्रोत व्यवस्थापन परियोजनाले सहयोग गर्दै आएको छ । अपि हिमाल स्याउ, आलु, राजमा, भटमासलगायतका बाली फल्ने राम्रो क्षेत्रको रूपमा चिनिन्छ ।

अहिले सडकको पहुँच अपि हिमालको वडा नम्बर ५ मकरीगाडसम्मै पुगेपछि अपिमा उत्पादित तरकारी सहज रूपमा बिक्री हुन थालेको छ । किसानले गाउँमा विगतमा सडेर जाने, खान नसकिएको तरकारी, दाल, आलुलगायतको राम्रो मूल्य पाउन थालेका छन् । अपि हिमालका स्थानीय पोखरसिंह रोकाया सडक पहुँच पुगेसँगै यो वर्षदेखि मकै, गहुुभन्दा आलु खेती विस्तार गर्न लागेको बताउँछन् । उनले भने, ‘मकै लगाउनुभन्दा आलु उत्पादन गरेर विक्री गर्ने योजना बनाएको छु । आफ्नो खेत र थप भाडामा लिएर आलु खेती गर्न सुरु गरेको छु ।’