दैलेख– दैलेखमै सबैभन्दा बढी तरकारी उत्पादन हुने गुराँस गाउँपालिकाले गत वर्ष १५ करोड रुपैयाँको तरकारी उब्जाएर बिक्री गरेको छ । लेकाली भू–भाग भएका कारण प्रशस्त मात्रामा यो क्षेत्रमा आलु, मूला, काउली, बन्दा, सिमीलगायत तरकारी उत्पादन हुने गरेको छ । परम्परागत रूपमै तरकारी खेती उत्पादनमा लागेका किसानलाई थप सहुलियत दिइएपछि उत्पादन बढेको हो ।

विशेषगरी गुराँस पालिकाले हाल आलु उत्पादनलाई महत्त्व दिँदै आएको छ । पालिकाका २, ४, ५, ६ र ७ नम्बरका युवा, गरिब, विपन्न समुदाय र कोरोनाका कारण रोजगारी गुमाएकालाई गत वर्षदेखि कृषिमा आबद्ध गरिएपछि ४ सय युवाले स्थानीय स्तरमै तरकारी उत्पादनमा लागेर रोजगारी प्राप्त गरेको पालिका अध्यक्ष खेमराज ओलीले जानकारी दिए । 

आलु उत्पादन र बजारीकणका लागि गुराँस र यूनएनडिपीको संयुक्त साझेदारीमा महिला सशक्तीकरण मञ्च दैलेखको सहकार्यमा यस्तो अभियान थालिएको हो । किसानलाई उन्नत बिउ वितरण, उत्पादित आलुको बिउ भण्डारणका लागि गाउँमै बिउ संरक्षण अभियान सुरु गरिएको छ । कामको खोजीमा भारत जाने युवा गाउँमै आम्दानी भएपछि रोकिएका छन् ।

विपन्नको आर्थिक उत्थानका लागि आलु उत्पादनलाई विशेष महत्त्व दिइएको यूएनडिपीका आर्थिक, सामाजिक पुनर्उत्थान परियोजनाका अमित विष्टले जानकारी दिए । कमजोर आर्थिक अवस्थाका नागरिक तरकारी उत्पदानमा लागेका कारण आर्थिक अवस्था सुध्रिँदै गएको विष्टको भनाइ छ ।
 

उत्पादन क्षेत्रको स्थलगत अध्ययन गरेका आलु विशेषज्ञ डा. भीम खत्रीले बजाीरकरणको कुनै पनि समस्या नभएकाले गुराँसेका किसानले आलु उत्पादनबाट लाखौँ आम्दानी लिन सक्ने र गाउँमै रोजगार हुने बताए । ‘बजारीकरणको कुनै समस्या छैन । आम्दानीको राम्रो स्रोत हुने भएपछि किसानमा उत्साह थपिएको छ’, खत्रीले भने । 

तरकारी उत्पादन र पशुपालन क्षेत्रमा गुराँस पालिका एवं यूएनडिपीको आर्थिक लगानीमा महिला सशक्तीकरण मञ्चले कार्यक्रमको सहजीकरण गरिरहेको छ । कार्यक्रमअन्तर्गत १ करोड ८० लाख रकम रुपैयाँ खर्च गरिएको महिला सशक्तीकरण मञ्च दैलेखकी अध्यक्ष सुनिता चन्दले जानकारी दिइन् ।