लमजुङ– अविरल वर्षासँगै आएको बाढीले मनाङको नासों गाउँपालिकाको कार्यालय बगाएपछि लमजुङको बेँसीसहरमा अस्थायी कायाालय स्थापना गरिएको
छ । धारापानी बजारमा रहेको कार्यालय बाढीले बगाएपछि लमजुङको बेँसीसहरबाट सेवा सुरु गरिएको गाउँपालिकाले जनाएको छ ।

गत ३१ जेठ रातीदेखिको अविरल वर्षासँगै मस्र्याङ्दी नदीमा आएको बाढीले पालिकाको कार्यालय बगाएपछि गाउँकार्यपालिका बैठकले बेँसीसहरमा आपतकालीन कार्यालय सञ्चालन गर्ने निर्णण गरेको थियो । पालिकाले बेँसीसहरमा कार्यालय स्थापना गरेर सेवा दिन थालेको गाउँपालिका अध्यक्ष चन्द्र घलेले बताए ।

मस्र्याङ्दी नदीमा आएको बाढीले सडक अवरुद्ध हुनुका साथै सदरमुकाम चामे जाने पुलसमेत बगाएको र विद्युत् सेवा पनि अवरुद्ध भएपछि बेँसीसहरबाट सेवा सुरु गरिएको हो । गाउँपालिकाले कारोबार गर्ने बैंक बेँसीसहरमा रहेकाले पनि यहाँ आपतकालीन कार्यालय सञ्चालन गर्न सहज भएको प्रमुख प्रशासकीय अधिकृत विश्वबन्धु रेग्मीले बताए ।

वर्षाका कारण गाउँपालिकाभर पूरै जोखिम रहेकाले कार्यालय सञ्चालन गर्ने उपयुक्त र सुरक्षित स्थान नहुँदा छिमेकी लमजुङको बेँसीसहर झर्न बाध्य भएको उनले जानकारी दिए ।

‘आर्थिक वर्षको अन्तिम समय भएकाले चालू आर्थिक वर्षमा सञ्चालित योजनाको भुक्तानी गर्नुपर्ने, राहत व्यवस्थापन सहजीकरण गर्नुपर्ने भएकाले कार्यपालिकाको बैठकले बेँसीसहरमा आपतकालीन कार्यालय सञ्चालन गर्ने निर्णय गरेको उनको भनाइ छ । राहत वितरण गर्न मनाङ पुगेका हेलिकोप्टरसँग सहकार्य गरी गाउँपालिकाका कर्मचारीलाई बेँसीसहर ल्याइएको गाउँपालिकाले जनाएको छ ।

प्रमुख प्रशासकीय अधिकृत, योजना शाखा प्रमुख र लेखा प्रमुखले बेँसीसहरबाट सेवा दिन थालेका छन् ।अहिले नासोंबाट कुनै पनि आर्थिक कारोबार गर्न सक्ने अवस्था छैन । धारापानीमा सडक र घर बगाएपछि त्यहाँका स्थानीय र प्रहरी विद्यालयमा बस्दै आएका छन् । मानिस सबै ओडार गाउँमा विस्थापित भएका छन् ।

प्रमुख जिल्ला अधिकारी विष्णु लामिछानेले धारापानीमा अब मानिसको बस्ती बस्न गाह्रो रहेको बताए । धारापानीमा गाउँपालिकाको कार्यालयसँगै रहेको प्रभु बैंक, प्राइम कमर्सियल बैंक, सीमा प्रहरी चौकी, पर्यटकीय होटलसहित स्थानीयका १० घर मस्र्याङ्दीले बगाएको थियो ।

गाउँपालिकाको योजना अनुगमन, भुक्तानी, नयाँ योजना छनोटलगायत महत्त्वपूर्ण काम गर्दै आएको कम्प्युटरसहितका सबै कागजपत्र मस्र्याङ्दी नदीको बाढीले लगेको छ ।

प्रमुख प्रशासकीय अधिकृत रेग्मीसहित १५ कर्मचारीले ५ दिन ढुंगाको पहरामुनि रात बिताएका थिए । गाउँपालिकामा बिजुली, सञ्चार, इन्टरनेट नहुँदा जनप्रतिनिधि, कर्मचारी र स्थानीयबीचमै सम्पर्क विच्छेद भएको थियो ।

एक ठाउँबाट अर्को ठाउँमा पुग्ने बाटो, पुल सबै बाढीले बगाएको छ । मान्छे हिँड्नेसमेत बाटो छैन । यसले गर्दा संकट आउन सक्ने स्थिति छ । नासों गाउँपालिका क्षेत्रका गाउँ पूर्ण रूपमा विस्थापित भएका छन् ।

‘गाउँपालिकाले प्रत्येक वडालाई १५ बोरा चामल र २ बोरा नुनको व्यवस्था गरेको छ । पूर्ण रूपमा विस्थापितलाई अलग्गै एक बोरा चामल, खाना बनाउने भाँडा सेट दिएका छौँ’, पालिका अध्यक्ष घलेले भने । तत्काल बेँसीसहरबाट यातायात खुलाउन सक्ने अवस्था नरहेको गाउँपालिकाले जनाएको छ ।