नेपालभर सोमबार १११औँ अन्तर्राष्ट्रिय नारी दिवस विभिन्न कार्यक्रम गरी मनाइयो । यो दिन नारी हकहितका विषयका नारा र भाषण जताततै उर्लिए ।
३ वटै तहका सरकारले नारी दिवसम आ-आफ्नै ढुंगले कार्यक्रम गरे । तनहुँका स्थानीय तहले पनि विभिन्न कार्यक्रम गर्न भ्याए ।
तनहुँको देवघाट गाउँपालिकाले भने नारी पुरुष बराबरको सन्देश प्रवाह गर्न श्रीमतीले श्रीमान्लाई बोकेर दौडने प्रतियोगिता आयोजना गरेको छ । देवघाटको वडा नम्बर ५ कालिका माविमा भएको मैत्रीपूर्ण दौडमा १६ वटी श्रीमतीले श्रीमान् बोकेर दौडिए ।
विष्णु अधिकारी र पदम अधिकारीको दम्पती प्रथम, गंगा गुरुङ र नवीन गुरुङको दम्पती दोस्रो, सीता लामिछाने क्षेत्री र बमबहादुर थापा क्षेत्रीको दम्पतीले तेस्रो स्थान हासिल गरे । प्रथम, दोस्रो र तेस्रोलाई सिल्ड र प्रशंसापत्रले सम्मान गरियो । सहभागी सबैलाई प्रशंसापत्रले सम्मान गरिएको गाउँपालिकाले जनाएको छ ।
नारी पुरुषसरह सक्षम हुन्छन् भन्ने सन्देश फैलाउन श्रीमतीले श्रीमान्लाई बोकेर दौडने मैत्रीपूर्ण प्रतियोगिता आयोजना गरिएको गाउँपालिका अध्यक्ष दुर्गबहादुर थापाले बताए ।
‘संविधानले नै नारी पुरुष समान भने पनि व्यवहारमा कार्यान्वयन भएको छैन । आधा आकाश ढाक्ने नारी पुरुष जत्तिकै सक्षम भएको प्रमाणित गर्न खोजेका हौँ’, उनले भने ।
दौडले दम्पतीको सम्बन्धलाई थप सुमधुर बनाउने गाउँपालिका अध्यक्ष थापाको बुझाइ छ । उनले भने, ‘शारीरिक र मानसिक रूपमा नारी पनि तन्दुरुस्त हुन्छन् । समाजको हेर्ने दृष्टिकोण मात्र कमजोर हो । हरेक क्षेत्रमा नारीको सम्मान जरुरी छ ।’
तनहुँका १० वटा स्थानीय तहमध्ये धेरैले नारी दिवसको कार्यक्रम गरे । व्यास नगरपालिकाले २१ किलोमिटर दूरीमा प्रथम व्यास नगर महिला खुला हाफ म्याराथन प्रतियोगिता गरेको छ । म्याग्दे गाउँपालिकाले एकल महिलालाई रातो टीका र पछ्यौरी ओड्याएको छ ।
मुगुमा नाटक देखाएर मनाइयो
मुगुको छायानाथ रारा नगरपालिकाले यस वर्षको नारी दिवस विभिन्न कार्यक्रम आयोजना गरी मनाएको छ । सदरमुकाम गमगढी बजारमा विभिन्न सांस्कृतिक पक्ष झल्कने गरी स्थानीय देउडा खेल खेलेर, वक्तृत्वकला, नाटक, निबन्ध प्रतियोगिता गरेर दिवस मनाइएको हो ।
नगरपालिकाको आयोजना, जिल्ला समन्वय समितिको समन्वय र जिल्लामा क्रियाशील गैरसरकारी संस्थाको आर्थिक सहयोगमा कार्यक्रम सञ्चालन गरिएको हो ।
महिला दिवसको अवसरमा देउडा खेल प्रतियोगिता गरिएको छ । प्रतियोगितामा नगरपालिकाको १ देखि वडा नम्बर १४ का महिलाले सहभागिता जनाएको छायानाथ जनाएको छ ।
प्रतियोगितामा सहभागीलाई समान रूपले पुरस्कार र प्रमाणपत्र वितरण गरिएको नगर प्रमुख हरिजंग शाहीले बताए ।
सफल महिला उद्यमी सम्मानित
नारी दिवसकै अवसरमा छायानाथ रारा नगरपालिकाले एक सफल महिला उद्यमीलाई सम्मान गरेको छ । रारा होजियारीका उद्यमी धनमाया सिंह बुढालाई सम्मानपत्र र नगदसहित सम्मान गरिएको हो ।
बुढाको हाते बुनाइ सीपले स्थानीय हुँदै अन्तर्राष्ट्रिय स्तरसम्म चर्चा पाएको छ । उद्यमी महिलासँगै स्नातकोत्तर उत्तीर्ण ६ जना महिला पनि सम्मानित भए ।
वक्तृत्वकलामा रारा प्रथम
१११औँ महिला दिवस अवसरमा वक्तृत्वकला प्रतियोगिता आयोजना गरियो । लैंगिक विभेद शीर्षकको वक्तृत्वकला प्रतियोगितामा नगरका ५ वटा विद्यालयले सहभागिता जनाएका थिए ।
प्रतियोगितामा रारा डायनामिक बोर्डिङ स्कुलकी छात्रा एलिसा चौलागाई प्रथम भइन् । थापा मेमोरियल बोर्डिङ स्कुलकी सुनिता कार्की द्वितीय, महाकाली नमुना माध्मिक विद्यालयकी छात्रा जमुना बिसी तृतीय र कर्णाली मावि टोप्लाकी सुष्मा शाहीले सान्त्वना स्थान प्राप्त गरिन् ।
प्रतियोगितामा प्रथम, द्वितीय र तृतीय हुनेलाई क्रमशः ५ हजार, ३ हजार, २ हजार र १ हजार रुपैयाँ नगद पुस्कार प्रदान गरियो ।
निबन्धमा रोवा प्रथम
दिवसकै अवसरमा ‘हाम्रो समाज र संस्कृति’ शीर्षकमा निबन्ध प्रतियोगिता गरिएको छ । प्रतियोगितामा प्रभात माध्यमिक विद्यालयकी छात्रा सृष्टि कार्की प्रथम, कर्णाली मावि टोप्लाकी छात्रा आसिका शाही द्वितीय, थापा मेमोरियल बोर्डिङ स्कुलकी राममाया बिसी तृतीय र रारा डायनामिक बोर्डिङ स्कुलकी निशा बुढा सान्त्वना भइन् ।
प्रतियोगीलाई कापी, कलम, क्याल्कुलेटरसहित पुरस्कार प्रदान गरिएको आयोजकले जनाएको छ ।
तिलोत्तमाले साइकल बाँडेर मनायो
रूपन्देहीको तिलोत्तमा नगरपालिकाले श्रमिक महिलाका लागि साइकल वितरण गरेको छ । १११औँ अन्तर्राष्ट्रिय महिला दिवस अवसरमा नगरपालिकाले ५१ जना श्रमिक महिलालाई साइकल बाँडेको हो ।
श्रमिक महिलाको सम्मानका साथै तिनको दैनिकीलाई सहज बनाउन सहयोग पुगोस् भनेरै साइकल प्रदान गरिएको नगर उप-प्रमुख जगेश्वरदेवी चौधरीले बताइन् ।
श्रमिकको आर्थिक, सामाजिक अवस्थाको आधारमा वडा कार्यालयको सिफारिसअनुसार प्रत्येक वडाका ३ जनाको दरले ५१ जनालाई साइकल वितरण गरिएको नगरपालिकाले जनाएको छ ।
दिवस अवसरमा नगरपालिकामा आयोजित कार्यक्रममा लुम्बिनी प्रदेश उपसभामुख कृष्णी थारुले श्रमिक महिलालाई साइकल हस्तान्तरण गरिन् ।
नगरपालिकाले ‘महिला सुरक्षा र रोजगार: समृद्ध तिलोत्तमा निर्माणको आधार’ विषयक वक्तृत्वकला प्रतियोगितासमेत सम्पन्न गरेको छ । १७ जनाले सहभागिता जनाएको प्रतियोगितामा चन्द्रा घिमिरे प्रथम, देवकी न्यौपाने द्वितीय, गीतारानी बराल तृतीय र कविता ज्ञवाली तथा प्रतिमा पन्तले प्रोत्साहन पुरस्कार प्राप्त गरे ।
समुदाय स्तरका महिलाले सहभागिता जनाएको प्रतियोगितामा उनीहरूले आफूले भोगेका समस्यासमेत सुनाए । प्रतियोगितामा ऋषिराम भुसाल, माया घिमिरे र मीनाक्षी न्यौपानेले निर्णायकको भूमिका वहन गरेका थिए ।
कार्यक्रममा प्रदेश उपसभामुख थारुले सकारात्मक व्यवहारले मात्र लैंगिक विभेद हट्ने बताउँदै परिवारबाटै समानता कायम हुनुपर्नेमा जोड दिइन् । पहिलेको तुलनामा विभेद धेरै हटेको हुँदा राज्यले बनाएका नीति-नियमको सही कार्यान्वयनले विद्यमान विभेद पनि हटेर जाने विश्वास उनको छ ।
तिलोत्तमाले समानतामूलक समाज निर्माण र नगरका महिलामा उद्यमशीलताको विकासका लागि सञ्चालन गर्दै आएका काम प्रशंसनीय रहेको उनको बताइन् ।
कार्यक्रममा नगरप्रमुख वासुदेव घिमिरेले तिलोत्तमालाई लैंगिकमैत्री नगरपालिका बनाउन थालिएको जानकारी दिए । महिलाले समान कामको समान ज्याला पाउनुपर्छ भन्नेमा नगरपालिका प्रतिबद्ध रहेको उनको धारणा छ ।
नगर उपप्रमुख जगेश्वरदेवी चौधरीले रुदीवादी चिन्तन र व्यवहार त्याग्न सके मात्र समतामूलक समाज निर्माण हुने बताइन् । समान कामको समान ज्यालासम्बन्धी निर्णय तिलोत्तमाले यसअघि नै गरिसकेकाले यसबारे नगरपालिकामा कुनै उजुरी नआएको उनले जानकारी दिइन् ।
नगरपालिकाका प्रमुख प्रशासकीय अधिकृत प्रदीप पौडेलको स्वागत, इन्दिरा अर्यालको सञ्चालनमा भएको कार्यक्रममा राजनीतिक दलका प्रतिनिधि, विभिन्न संघ-संस्था, आमा समूह, क्लब, टोल विकास संस्थाका प्रतिनिधि सहभागी थिए ।