गुल्मी– गुल्मीमा खरका छानामुक्त र एक घर एक धारा २०७४ का ३ वटै निर्वाचनको प्रमुख चुनावी नारा थिए । धुर्कोट गाउँपालिका जनप्रतिनिधिले पद वहालीकै दिन अर्थात् २८ असार २०७४ मा खरका छानामुक्त गर्ने पहिलो निर्णय गरे ।

 

निर्णय भएको ४ वर्ष पुगेकै दिन सोमबार जिल्ला समन्वय समिति प्रमुख लक्ष्मण पराजुलीले धुर्कोट गाउँपालिकालाई खरका छानामुक्त गाउँपालिका घोषणा गरे ।
खरका छानामुक्त गाउँपालिका घोषणा गर्दै पराजुलीले स्थानीय तहहरूले चुनावमा गरेका वाचा पूरा गर्न थालेकामा खुसी व्यक्त गरे ।

 

उनले जिल्लामा खरका छाना विस्थापन र एक घर एक धाराको विषयमा भएका कामको चर्चा गरे । साथै, विभिन्न अभियान र कार्यक्रममा सधैँ एक कदम अगाडि बढेकामा धुर्कोट गाउँपालिकाको प्रशंसा व्यक्त गर्दै सबै स्थानीय तहलाई असल अभ्यासको सिको गर्न आग्रह गरे ।

 

अहिले खरका छानामुक्त अभियान गुल्मीसहित देशभर सञ्चालन भएको छ । तर, गुल्मीका १२ स्थानीय तहमध्ये पहिलो पटक धुर्कोट गाउँपालिका खरको छानामुक्त गाउँपालिका घोषणा भएको छ ।

 

खरका छानामुक्त अभियानको पहिलो निर्णय र अभियान पूरा गर्ने देशभरका स्थानीय तहमा आफूहरू पहिलो भएको गाउँपालिका प्रमुख भुपाल पोख्रेलले दाबी
गरे । ‘गत वर्ष नै धुर्कोटमा खरका छाना विस्थापन गर्ने काम सक्यौँ । तर, कोभिडका कारण घोषणा गर्न सकेका थिएनौँ,’ उनले भने, ‘यो कार्यक्रमको निर्णय र कार्यान्वयन गर्ने देशभरमा धुर्कोट पहिलो हो ।’ 

 

करिब साढे १९ करोड खर्च

 

धुर्कोट गाउँपालिकालाई खरका छानामुक्त घोषणा गर्न करिब साढे १९ करोड रुपैयाँ बजेट खर्च गरिएको छ । गाउँपालिकामा १ करोड ८१ लाख ९२ हजार २ सय ८७ रुपैयाँ जस्तापाताका लागि रकम खर्च भएको छ ।

 

यसमा ५ सय ४ घरधुरीले जस्तातापा पाएका छन् । त्यस्तै, नागरिक सुरक्षित आवास कार्यक्रमअन्तर्गत १ सय ५७ घर निर्माण भएका छन् । यसका लागि ७८ लाख ५० हजार रुपैयाँ खर्च भएको गाउँपालिकाका प्रमुख प्रशासकीय अधिकृत काशीराम पन्थीले जानकारी दिए । 

 

जनता आवासअन्तर्गत ३७ र एकीकृत नमुना बस्ती कार्यक्रममार्फत १८ घर निर्माण भएका छन् । यी दुई कार्यक्रका लागि २ करोड ४६ लाख ५१ हजार ८ सय ३२ रुपैयाँ खर्च भएको छ ।

 

त्यस्तै, भुकम्पपछि ५ सय २९ घर पुनर्निर्माण गरिएको छ । यसका लागि १३ करोड ८३ लाख रुपैयाँ खर्च भएको प्रमुख प्रशासकीय अधिकृत पन्थीले बताए । 

 

२५ वर्षे रणनीतिक सोच 
 

धुर्कोट गाउँपालिकाले २५ वर्षे रणनीतिक सोच र पहिलो पाँच वर्षे आवधिक योजना अगाडि बढाएको छ । २५ वर्षे रणनीतिक सोचअन्तगएत ‘समृद्ध धुर्कोट हाम्रो शान‘ उत्पादनशील, शिक्षित, मर्यादित, मध्यम आय र रोजगारीका अवसर सिर्जना गर्ने रहेको छ ।

 

त्यस्तै, योजनामा सुखी नागरिक बसोबास गर्ने स्वच्छ सुन्दर पर्यटकीय अन्तरनिर्भर र समृद्ध धुर्कोट गाउँपालिका निर्माणको परिकल्पना गरिएको छ ।

 

धुर्कोट गाउँपालिका प्रमुख पोख्रेलले पहिलो ५ वर्षे आवधिक योजना निर्माण गरी अल्पकालीन, मध्यकालीन र दीर्घकालीन सोच र लक्ष्यका साथ आफूहरूले काम गरेको बताए । 

 

खरका छानामुक्त गर्ने कार्यक्रमसँगै ३ हजार १३ घरमा स्वच्छ पिउने पानीको व्यवस्था गरिएको, उत्पादनमा आधारित अनुदान, बाँझो जमिन उपयोगमा अनुदान वितरणसँगै खसीबोकाको मासुमा आत्मनिर्भर गाउँपालिका घोषणा गरिएको पोख्रेलले जानकारी दिए ।

 

भौतिक पूर्वाधारमा अब्बल

 

धुर्कोट गाउँपालिका जिल्लाका अरू स्थानीय तहको तुलनामा भौतिक पूर्वाधारमा समेत अब्बल देखिएको छ ।

 

गाउँपालिकाले २३ कोठे पालिका कार्यालय भवन निर्माण गरी सेवा प्रवाह गरिरहेको छ भने करिब ४ सय क्षमताको बहुउद्देश्यीय सभाहल, सहिदपार्क, धुर्कोट कोटमा संग्रहालय निर्माण, गाउँपालिकाको केन्द्र रहेको बर्बोट क्षेत्रमा ७ सय मिटर बाटो कालोपत्रे भइसकेको गाउँपालिका उपप्रमुख शिव खत्रीले जानकारी दिए ।

 

त्यसबाहेक सेउघादेखि धुर्कोट गाउँपालिका बर्बोटसम्मको १३ किमि सडक कालोपत्रेको काम अगाडि बढ्नुको साथै, स्थानीय सडक मर्मत तथा स्तरोन्नतिको काम भएको खत्रीले बताए ।

 

सडकसँगै चार वर्षको अन्तरालमा गाउँपालिकाभित्रका विद्यालय भवनमा ९६ वटा नयाँ कक्षाकोठा थप निर्माण भएका छन् ।  खत्रीका अनुसार १३ वटा शौचालय निर्माण र माध्यमिक तथा आधारभुत विद्यालयमा आईसिटी, विज्ञान प्रयोगशाला र पुस्तकालय निर्माण भएका छन् । 

 

त्यसबाहेक वन वातावरणतर्फ सुक्खा पोखरी निर्माण, खानेपानीका मुहान संरक्षण, सरसफाइ र वृक्षारोपणको काम भएको केसीले बताए ।