बाजुरा– बाजुरा प्रहरीले सामूहिक हत्याका मुख्य अभियुक्त भरत गिरीलाई १६ वर्षपछि पक्राउ गरेको छ । हत्या गरेर फरार रहेका गिरीलाई भारतको उत्तराखण्डमा पर्ने अल्मोडाबाट १० फागुनमा प्रहरीले पक्राउ गरेको प्रहरी नायब उपरीक्षक चर्तुभुज ओझाले बताए ।

४० वर्षीय गिरी नेपालको परिचय खुल्ने सबै प्रमाण नष्ट गरेर भारतीय रासन कार्ड लिएर लुकीछिपी बसेका थिए । उनलाई सुराकीका आधारमा १६ वर्षपछि पक्राउ गर्न प्रहरी सफल भएको प्रहरी नायब उपरीक्षक ओझाले जानकारी दिए  अभियुक्त गिरीलाई जिल्ला प्रहरी कार्यालय बाजुराले पत्रकार सम्मेलनमार्फत सार्वजनिक गरेको हो ।

गिरीसहितका दर्जन बढी युवा मिलेर ४ माघ ०६३ मा सामूहिक हत्या गरेका थिए । गाउँकै नाता पर्ने बहिनीसँगको अवैध सम्बन्धबारे थाहा पाएको रिसले रुखमा बाँधेर २४ वर्षीय नवराज गिरीको सामूहिक हत्या गरिएको थियो । निजका आमाबुबालाई कुटपिटसमेत गरिएका थियो ।

सामूहिक हत्यामा संलग्नमध्ये ९ जनाले प्रकृतिअनुसारको कैद सजाए भोगिसकेका भए पनि मुख्य अभियुक्त गिरी भने फरार थिए । भारतबाटै हत्या गरिएका गिरीको परिवारलाई पेस्तोल ल्याएर मार्ने र वंश नाश गर्ने धम्की दिँदै आएका गिरी पक्राउ पर्नु बाजुरा प्रहरीको ठूलो सफलता हो ।

साँझ ७ः३० बजेको समय ६ महिनाकी नाबालिका छोरीलाई काखमा च्यापेर सुतिरहेका बेला पुकार खान पसल जान बाध्य पारेर रुखमा बाँधी, भाला, खुँडा, खुकुरी, लाठी प्रयोग गरी नवराजको हत्या गरिएको थियो । शरीर नै टुक्रा–टुक्री पारी यातनासहित हत्या गर्ने मुख्य अभियुक्त गिरीलाई सर्वस्वसहित जन्मकैद सजाय तोकिएको छ ।

तत्काल १२ जनामाथि किटानी जाहेर गरिए पनि १० जनाको संलग्नता रहेको अदालतबाट पुष्टि भएको थियो । बाजुरा जिल्ला अदालतले ४ माघ ०६८ मा मुद्दाको फैसला गरी मुख्य अभियुक्त गिरीलाई सर्वस्वसहित जन्मकैदको फैसला सुनाएको थियो ।
उच्च अदालत दियापल र सर्वोच्च अदालतले पनि सोही फैसला सदर गरेको छ । इन्टरपोलसँगको समन्वयमा पक्राउ परेका गिरीलाई शुक्रबार नै जेल चलान गरिएको छ । 

नवराजको हत्यापछि सिंगो परिवार त्रासमा रहेको र त्यही चिन्ताका कारण आमाबुबाको समेत अकालमै ज्यान गएको थियो ।
जेल भुक्तान गरेर गएकाले समेत हालसम्म धम्की दिने गरेको मृतक नवराजकी भाउजू तारा गिरीको गुनासो छ । ‘सिंगो परिवारको विचल्ली भयो । न्यायका लागि आउँदा पनि उल्टै धम्की दिने काम भयो । त्यो अहिले पनि कायमै छ’, प्रहरीले आयोजना गरेको पत्रकार सम्मेलनमा भाउजू ताराले रुँदै भनिन् ।’ 

सोही घटनाले सिंगो कालापानी गाउँ नै भयभीत बनेको थियो । अपराधी कानुनको दायराभन्दा बाहिर जान सक्दैन भन्ने बलियो प्रमाण १६ वर्षपछि मुख्य अभियुक्त पक्राउबाटै प्रमाण गर्न सफल भएको प्रहरी नायव उपरीक्षक ओझाले बताए ।

पत्रकार सम्मेलनमा जिल्ला प्रहरी कार्यालय बाजुराले पछिल्लो समय प्रहरीले सम्पादन गरेको कामको प्रगतिबारे पनि जानकारी गराएको थियो ।