पाल्पाको निस्दी गाउँपालिकाका अध्यक्ष मुक्तबहादुर सारुलाई पालिका खबरवुटेटिनको पालिका टकका लागि करिष्मा कार्कीले सोधिन्ः के गर्दै हुनुहुन्छ अध्यक्षज्यू ? उनको उत्तरले भन्छः दुनियाँ हावादरी गफमै रमाइरहेको बेला हामीले चै हावाबाटै बिजुली उत्पादन गर्यौं । अरु के गर्यो त पालिकाले ?

कोरोनाको दोस्रो लहरमा पनि पालिकाभित्र एक जनाले पनि संक्रमणका कारण ज्यान गुमाउनु परेन । महामारी नियन्त्रणमा तपाईले कस्तो मोडालिटी अपनाउनु भयो र मानवीय क्षति हुन पाएन ? 

यो गाउँपालिका भनेको पाल्पाको सबैभन्दा पिछडिएको पालिका हो । यहाँका किसान विशेष गरी बढी मिहिनेत गर्छन् । कोही अझै पनि चप्पल लाउँदैनन् । उहाँहरूलाई कोरोनाबारे जानकारी गराउन खोज्यौँ, जनचेतना दियौँ । त्यसले गर्दा भाग्यवश कसैको पनि मृत्यु हुन पाएन । २ सय ६० जना कोरोना संक्रमित थिए । तर, ति संख्या अहिले घटिरहेको छ । अहिले १ सय ४७ जनामा मात्रै संक्रमण देखिएको छ । २ जना चिकित्सकको रेखदेमा ४८ जना क्वारेन्टिन र आइसोलेसनमा छन् । होम आइसोलेसनमा रहेकाको स्वास्थ्य अवस्था पनि सामान्य छ । 

यसपटक तपाईंले ल्याउने बजेट कार्यकालको अन्तिम बजेट पनि हो । चुनावी घोषणापत्रका थुप्रै वाचा पूरा भएनन् भन्ने गुनासो छ । यसपटक बजेटबाट जनताले के अपेक्षा गर्ने त ? 

यो पालिकामा राष्ट्रिय प्रशारण लाइनको विद्युत पुगेको छैन । गत वर्षदेखि मात्रै हामीले सामूहिक विद्युतमार्फत केही वडामा बत्ती बाल्न सफल भयौँ । यो विषम परिस्थितिमा पनि हामीले सबै वडामा बिजुली बत्ती बाल्ने काम गर्न कामदार खटाएका छौँ । हाम्रै कार्यकालमा नागरिकले राष्ट्रिय प्रशारण लाइनको विद्युत देख्न पाउनेछन् । आगामी वर्षभित्र हामीले थप विद्युत विस्तार गर्ने, १० भन्दा बढी पालिकामा लिफ्टिङ खानेपानी सुविधा विस्तार गर्ने तयारी गरेका छौँ । ‘एक घर एक धारा’को योजना पूरा गर्ने र खरको छाना हटाउने तयारी पनि हाम्रो छ । 

युवा लक्षित के कार्यक्रम ल्याउने सोच बनाउनुभएको छ  त ? 

यो वर्ष हामीले युवा लक्षित केही कार्यक्रम राखेका थियौँ । तर, कोरोना भाइरसले गर्दा कतिपय युवाहरूको  व्यक्तिगत र सामूहिक व्यावसाय गर्ने सोच पूरा हुन सकेन । आगामी वर्षका लागि बन्ने कार्यक्रममा पनि हामीले युवालाई प्राथमिकतामा राखेका छौँ ।  हामीले युवाहरूका लागि मनोरञ्जन, कृषि क्षेत्र लक्षित कार्यक्रम ल्याउने तयारी गरेका छौँ । 

सदरमुकाबाट टाढाको पालिका भएकाले ठूला अस्पतालको सेवाको पहुँच पालिकावासीमा छैन । यस्तो अवस्थामा पालिकामै स्वास्थ्यसेवा दिन तपाईका योजना के छन् ? 

स्वास्थ्य सुविधाका लागि हामीले गत वर्ष नै स्वास्थ्य भवन शिलान्यास गर्‍यौ । टेन्डर आह्वान गरेर सम्झौता गरेर अहिले भवन निर्माण सुरु भएको छ । नजिकै रहेको रामपुर नगरपालिकाको सरकारी अस्पतालसँग समन्वय गरेका छौँ । त्यहाँ बर्थिङ सेन्टर, ल्याब सबै सञ्चालनमा छ । त्यसबाट पनि नागरिकलाई सुविधा दिइरहेका छौँ । 

तपाईंको चुनावी घोषणपत्रको आकर्षक नारा थियो ‘एक घर एक धारा’ । के पालिकाभरी धारा बनिसकेका हुन् ? 

गाउँपालिकाको दुई तीन टोलमा मात्रै यो नारा सफल भएको छ । र, पनि गाउँमा पानी जाने क्रम सुरु भइसकेको छ । पानी नपुगेको ठाउँमा मिटरको पनि व्यवस्था गर्ने तयारी गरेका छौँ । र, छिटै सबै ठाउँमा ‘एक घर, एक धारा’ योजना सफल बनाउने छौँ । 

हावाबाट बिजुली निकाल्न गाउँपालिकाले रुक्सेभञ्ज्याङमा बिजुली उत्पादनको प्रक्रिया सुरु गरेको छ । निस्दीबासीले हावाबाट उत्पादन भएको बिजुली उपभोग गर्न कहिलेबाट पाउँछन् ?

यहाँ २५ किलोवाटको हावाबाट बिजुली उत्पादन भएको छ । त्यसबाट ८ सरकारी संस्थामा विद्युत सेवा पुर्‍याएका छौँ । १ सय ५२ घरलाई पनि यो सुविधा उपलब्ध छ । उपभोक्ताले बिजुली उपभोग गरिरहेका छन् ।