चैत १२, २०८०
भदौ १८, २०७८
काभ्रे– काभ्रेको नमोबुद्ध नगरपालिकामा झन्डै ३० करोड रुपैयाँ लागतमा बृहत् खानेपानी आयोजना सञ्चालन हुने भएको छ । नमोबुद्ध नगरपालिकाको पहलमा खानेपानी तथा ढल व्यवस्थापन विभागअन्तर्गत संघीय खानेपानी तथा ढल व्यवस्थापन आयोजनामार्फत नगरपालिकाको वडा नम्बर ६, ७ ८ सहित भकुन्डे उपत्यकामा खानेपानी सुविधाको पहुँच पुर्याउन भकुन्डेबेँसी, खनालथोक, खाक्सी, दाप्चा क्षेत्र बृहत् खानेपानी आयोजना सञ्चालन प्रक्रिया अघि बढेको हो ।
वडा नम्बर ६ स्थित रोशी खोलाबाट लिफ्ट गरी १६ सय बढी घरधुरीका लागि खानेपानीको व्यवस्थापन गर्न संघीय खानेपानी तथा ढल व्यवस्थापन आयोजनाले २९ करोड ७८ लाख २० हजार ३ सय ६८ रुपैयाँ बराबरको लागत अनुमान गरेको छ ।
नमोबुद्धका नगरप्रमुख टिपी शर्मा तिमल्सिनाले नगरको गौरवको आयोजना भएको र यसले एक घर एक धाराको अभियानलाई सफल बनाउन महत्त्वपूर्ण भूमिका खेल्ने बताए ।
तिमल्सिनाले आयोजना सञ्चालनका लागि मूलको व्यवस्थापन भइसकेको र उपभोक्ता समिति पनि गठन भइसकेको सन्दर्भमा अब आयोजनाको काम अघि बढ्ने जानकारी उनले जानकारी दिए ।
खानेपानी उपभोक्ता समितिका अध्यक्ष मोहनकुमार श्रेष्ठले आयोजना सम्पन्न भएपछि दीर्घकालीन रूपमा खानेपानी समस्या समाधान हुने बताए । बिहीबार आयोजना सञ्चालनबारे नगरपालिका र उपभोक्ता समितिबीच छलफल भएको थियो । छलफलले आयोजना कार्यान्वयनको प्रक्रियालाई तत्कालै अघि बढाउने निर्णय गरेको छ ।
आयोजना निर्माण सुरु भएको तीन बर्षभित्र सम्पन्न हुने लक्ष्य राखिएको छ । नमोबुद्ध नगरपालिकाले जनप्रतिनिधि निर्वाचित भएदेखि नै चुनावी प्रतिबद्धताअनुसार एक घर एक धाराको अभियान सुरु गरेको थियो । अभियानलाई सफल बनाउन नगरभित्र सानाठूला खानेपानी आयोजना सञ्चालन भइरहेका छन् ।
चैत १९, २०८०
चैत १९, २०८०
चैत २२, २०८०
चैत १८, २०८०
