धनुषा– नेपालकै पुरानो मध्येको एक जनकपुर विमानस्थलको नयाँ टर्मिनल भवन तयार भएको छ । आठ वर्षको प्रतीक्षापछि मंगलवार (पर्सी) भवनको विधिवत उद्घाटन हुने तय भएको जनकपुर विमानस्थल प्रमुख किरण गौतमले पालिकाखबरलाई बताए ।

झन्डै ५० करोड़को लागतमा नयाँ टर्मिनल भवन निर्माण भएको हो । अब जनकपुर विमानस्थलले आधुनिक स्वरुप ग्रहण गर्ने गौतमले बताए । भवन उद्घाटन पर्यटन मन्त्री योगेश भट्टराईले गर्नेछन् ।

नयाँ टर्मिनल भवनबाट यात्रुले खानेपानी, पार्किङलगायत सबै सेवा सहज रुपमा पाउनेछन् । विमानस्थलको स्वरुप फेरिएपछि जनकपुरमा आन्तरिक र बाह्य पर्यटक भित्रिने अपेक्षा स्थानीयको छ ।

मुलुककै पुरानो हवाई अड्डा

विमानस्थल ८ असोज, २०२४ देखि सञ्चालनमा आएको थियो । त्यतिबेला एउटा मात्रै जहाज उड्न मिल्ने गरी भारतले बनाइदिएको जनकपुर विमानस्थलको पुरानो टर्मिनल भवन साँघुरो र अव्यवस्थित छ ।

दुईतले सानो भवनकै माथिल्लो तल्लामा रहेको पुरानै टावरबाट जहाज उडान र अवतरण भइरहेको छ । नयाँ टर्मिनल भवन निर्माण सुरु गरिएको पनि वर्षौं बितिसकेको छ ।

जनकपुर विमानस्थलाई क्षेत्रीय विमानस्थलको रुपमा विकास गर्ने परिकल्पनाअनुसार निर्माण थालिएको नयाँ टर्मिनल भवनमा नेपालमै पहिलो पटक नयाँ प्रविधिको प्रयोग गएिको छ ।  

निर्माण सुरु भएपछि प्राविधिक त्रुटि तथा रकम अभावले अहिलेसम्म पूरा हुन सकेको थिएन । विमानस्थल निर्माण वर्षौंदेखि सुरु भए पनि सरोकारवाला निकायको ढिलासुस्तीका कारण ढिलाइ भएको जनकपुर नागरिक समाजका सदस्य मुरली मनोहरले बताए ।

विमानस्थल कर्मचारीका अनुसार आन्तरिक टर्मिनल भवनअन्तर्गत जनकपुर विमानस्थलमा बनाइएको यो भवन नेपालकै नमुना हो । अढाई तले यो भवन फलामकै जगमा उभ्याइएको छ ।

२०६९ कात्तिकमा १८ करोडको लागतको यो भवनको  तत्कालीन पर्यटन तथा नागरिक उड्डयनमन्त्री पोष्टबहादुर बोगटीले शिलान्यास गरेका थिए ।

डेढ वर्षभित्र सम्पन्न गर्ने गरी निर्माण कम्पनी पप्पु एन्ड एनके कन्स्ट्रक्सन तथा नेपाल नागरिक उड्डयन प्राधिकरणबीच १५ असोज, २०६९ असोजमा सम्झौता भएको थियो । डिजाइनमै त्रुटि देखिएको भन्दै ठेकेदार कम्पनीले समयमा काम सक्न नसकेको बताउँदै आएको थियो ।

ठेकेदारले काममा ढिलासुस्ती गरेपछि डिजाइन र स्टिमेटमा सुधार गरी ६ करोड रुपैयाँ पुनः थप गरियो । समयमा काम नभएपछि पुनः अर्को निर्माण कम्पनी ढेकिङ ग्याल्बा उमा एन्ड कम्पनीको मूल ठेक्कामा स्थानीय अम्बे बिल्डर्सलाई सबकन्ट्याक्ट दिएर निर्माण अघि बढाइएको हो ।

जनकपुर प्रदेश २ को राजधानी भएपछि अहिले हवाई यात्रुको चाप ह्वात्तै बढेको छ । नयाँ टर्मिनल भवनसँगै अत्याधुनिक टावर पनि बनाइएको छ । बर्खायाममा डुबानमा पर्ने पुरानो टर्मिनल भवन भत्काएर एप्रोन एरिया छुट्याइएको छ ।

टर्मिनल भवन अभावका कारण ५२ वर्ष पुरानो भवनबाटै यात्रुले सेवा लिनुपर्ने बाध्यता छ । विमान कम्पनीको काउन्टर बीचमै हुँदा यात्रुले सानो भवनमा प्रतीक्षा गर्नुपर्छ । विमानस्थलमा धावन मार्ग र पार्किङस्थल फराकिलो बनाएर स्तरोन्नति गरिएको छ ।

विमानस्थलमा अहिले फ्युलिङ, वारुण यन्त्र र एक्सरे मेसिनसमेत जडान भएको छ । रात्रि उडानको सफल परीक्षण गरिसकेको यो विमानस्थलमा नेपाल आयल निगमले इन्धन भण्डारण सुविधा पनि सञ्चालनमा ल्याएको छ ।

कोरोना संक्रमण सुरु हुनुपूर्व जनकपुर र काठमाडौंका लागि बुद्ध र यती एयरका ६  विमानले दैनिक उडान भर्दै आए पनि अहिले दैनिक ५ उडान मात्र हुने गरेको छ । अहिले जनकपुरबाट बुद्ध एयरको ७२ सिटे विमानको ३ उडान र यती एयरले ७१ सीटे १ उडान र श्री एयरको ८० सीटको एउटा गर्दै आएको छ ।