डडेल्धुरा– डडेल्धुराको बोलन्याथली गाउँपालिकाले डडेल्धुरा अस्पताललाई ४० थान अक्सिजन सिलिन्डर हस्तान्तरण गरेको छ । बोलन्याथलीले नेपालगञ्जबाट ल्याएर अस्पतालाई अक्सिजन सिलिन्डर हस्तान्तरण गरेको हो ।

डडेल्धुरा पुगेका सबै सिलिन्डर बोलन्याथली डडेल्धुरा युनिट प्रमुख दीपकराज भट्टले अस्पताल विकास समितिका अध्यक्ष करुणाकर ओझालाई हस्तान्तरण गरेका हुन् ।

हेल्पिङ ह्यान्ड अमेरिकाको सहयोगमा ४० थान भरिएका सिलिन्डर खरिद गरी अस्पताललाई हस्तान्तरण गरेको बोलन्याथलीका संयोजक यादव जोशीले बताए ।
उक्त सिलिन्डरको व्यवस्थापनमा अभियानकर्ता हेमराज थापा, यम खड्का र बाँकेका प्रमुख जिल्ला अधिकारीले सहयोग गरेको संयोजक जोशीले जानकारी दिए ।
डडेल्धुरा अस्पतालमा अक्सिजन अभाव हुँदा कोरोना संक्रमित बिरामीको उपचारमा समस्या भएको छ ।

डडेल्धुरासहित सुदूरपश्चिमका अन्य पहाडी जिल्लाका बिरामी पनि डडेल्धुरा अस्पतालमा आउने भएकाले उपचारमा समस्या भएको डडेल्धुरा अस्पतालले जनाएको छ ।

१ जना बिरामीका लागि १ जना नर्स हुनुपर्नेमा डडेल्धुरा अस्पतालको आइसियुमा ५ जना मात्रै नर्स छन् । २४ सै घन्टा सेवा दिँदा १ दिन बिदा दिनुपर्ने प्रावधान भए पनि अहिले नर्स मात्रै नभई चिकित्सकले समेत आराम गर्ने समय नपाएको अस्पतालका सूचना अधिकारी टंकप्रसाद पन्तले बताए ।

उनका अनुसार डडेल्धुरा अस्पतालमा हालसम्म ४७ जनाले उपचार लिएका छन् भने कारोनाका १८ जना बिरामी निको भएर घर फर्किसकेका छन् ।

डडेल्धुरा अस्पतालको अक्सिजन प्लान्टबाट दैनिक २७ सिलिन्डर भर्ने क्षमता छ । यसले ११ जनालाई अक्सिजनमा राखेर उपचार गर्न सक्छ । तर, अहिले ११ जनाभन्दा बढीलाई अक्सिजन दिइरहेको अस्पताल विकास समितिका अध्यक्ष ओझाले बताए ।

अक्सिजन अभाव भइरहेको समय बोलन्याथलीले अस्पताललाई अक्सिजन सिलिन्डर हस्तान्तरण गरेकामा उनले धन्यवाद दिए ।